ZALEN December 5, 2024 : Central sawrkar chuan Mizoram chhunga Sangau leh Saisichhuah kawng sial a tum chu state sawrkarin a paltlang tur ram a tihfel theih loh avangin a ti tawp a, heng kawng hi BRO project hnuaia General Staff Scheme hna nena inthunzawm tur a ni.

Central chuan he kawng siamna atan hian Cheng vaibelchhe 66.08 a ruahman tawh a, hei hi Mizoram-a Lawngtlai district leh Myanmar-a Chin State inkalpawhna tur a ni.

Union Minister Sukanta Majumdar chuan hetiang thutlukna an siam chhan hi Mizoram sawrkar chu June 2024 hmaa helai kawng patlang tur ramte a thlawna hman tura an hriattirnaah an hlawhchham vang niin a sawi. Rajya Sabha MP K. Vanlalvena hemi kawng chungchang a zawhnaah Majumdar chuan, "Heng fund te tihtawp a nih chhan chu duh anga thawhpuina tha dawn loh vang a ni," tiin a chhang.

Border Roads Organisation (BRO) chuan he project atan hian February 2021 khan saction a tichhuak a, hei hi border trade atana inkalpawhna tha zawk siam tumna vang a ni. Sangau-Saisichhuah Road hi Thisai to Pangkhua-Sangau Road te nena inzawm tur niin, he scheme hi General Staff of BRO te puihnaa thawh tura ruahman a ni.

He fund hi hnuhdawh a nih takah hian Mizoram Chhim lam leh Myanmar inkalpawhna tur hnathawh chu a tikhawtlai ang tih hlauhna a lian hle. Amaherawhchu, project lian zawk atana inbiakna a awm chuan ruahmanna hi kaltlangpui a ni thei tho bawk.

Fund tihtawp chungchangah hian Mizoram sawrkar chuan thu leh hla engmah a la nei lo. Ram tih fel tur tihkhawtlai a ni hian inrelbawlna lamah pawh harsatna tenau chu a thlen a, hmasawnna atana hnathawhna hi engemaw chen chu a tikhawtlai tura ngaih a ni.