Aizawl January 26, 2025 : Mizo Zirlai Pawl (MZP) chuan thuchhuah siamin scholarship thawh thumna (3rd installment) tur hi central sawrkar, Ministry of Tribal-in Mizoram sawrkar hnenah pawisa an la pek loh avângin sem theih a la ni lo tih an sawi.

Nimina thuchhuah an siamah MZP chuan scholarship thawh thumna nghaktu zirlaite atangin MZP chuan zawhna a dawng nasa hle tih sawiin Zirtawpni khan Mizoram Scholarship Board hotute thil awmdan an zawtfiah tih sawiin 2nd Installment sem zawh a nih khan UC leh lehkha pawimawh tihfel ngaite thehluh nghal ni mah se central-in pawisa an la pe thei lo niin an sawi a. Pawisa dawn a nih veleh sem nghal tum a ni tiin zirlaite chu dawh thei taka nghak hram hram turin an ngen tih an sawi.

Post Matric Scholarship (2023-2024) hi zirlai 31,685-in an dil a, 26,670 pek tawh an ni a, la dawng lo 5,015 an awm mek a. Heng zinga zirlai 3,981 chu sum awm veleh pek nghal tur an ni a, 1,034-te pending mekin zirlai 898-te erawh Aadhar seeding loh avang leh chhan dang dang avangin reject list-ah an awm thung.