Aizawl; Mizoram a Jail lian ber Central jail ah Covid 19 hripui kai hmuh chhuah mi 96 an awm tawh a, postive contact khunghran mi engemaw zah an la awm mek avangin an dinhmun dik tak tur hriat a la harsa rih ni a thudawn a ni.

ZALEN thudawn danin Central jail a hri kai hmuh chhuah tawh mi 96 atangin he thu ziahlai nimin thleng a dam tawh chu mi 34 an ni a, tun dinhmun a hri vei mek zing ah ZMC a enkawl pakhat awmin, thubuai tenau nei, tunhnai a court in a chhuah positive pakhat awm bawkin, midang zawngte chu Central jail chhung a Covid veite enkawlna hmun CCC ah enkawl mek an ni.

Central jail ah hian tun hma lam a hmeichhe Jail hlui chu Covid vei te enkawlna atan buatsaih niin, chung ward 5 leh cell pakhat chu Central jail a medical staff awm sa, Doctor pakhat leh nurse 3 ten vil in, a theih ang angin Central jail staff ten an puibawm thin bawk.  

ZALEN thudawn danin, Covid chungchang ah Central jail dinhmun in ziaawm lam an pan ah ngaih a nih rualin, hri vei hmuh chhuah te nen a tir a awm ho, test na a negative result la nei si te an awm a, chung mite chu test la hmabak an la nih avangin an dinhmun chiang taka sawi mai theih a la ni rih lo.

Central jail ah hian tun dinhmun ah mitang mi 500 chuang hret awm mekin, hri kai hmuh chhuah hmasak ber 20 te chu May 24, 2021 khan RAgT atangin hri an kai tih hmuh chhuah a lo ni tawh a, hemi hnu June 5 a sample endik ah mi 43 in hri an kai tih hmuh chhuah leh a ni. Sorkar thuchhuah tarlan danin, hri kai hmuh chhuah hmasak ber mi 20 te hi May 5, 2021 a tang dah thar atanga kai chhawng nia ngaih an ni.