Aizawl March 18, 2024 : ZPM General Headquarters chhung inkhawmah Chief Minister Lalduhoma chuan ZPM chu tualto Party an nih angin vanneihna bik an nei a, central sawrkarah zawm bik an neih loh avangin tuman an kut an phuar sak ve dawn lo, a thu a zira Central sawrkar thlawp thei tu leh dodal theitu party an ni a, hei vang hian Central sawrkar pawhin an ngai pawimawh a, vawiin thlengin an la thawhpui tha niin a sawi.

Lalduhoma chuan Lok Sabha inthlana an party candidate tur chungchang sawiin, "Kan hma lawka MP inthlan lo awm turah ZPM Party-in candidate atan Pu Richard Vanlalhmangaiha a ruat hi lawmawm ka ti a, a ni hi thlahtu chhui dawl tak, chhungkaw belh chian dawl tak atanga MP candidate kan nei hi kan vannei hle a ni. Thiamna lamah pawh B.Com niin English leh Hindi thiam tak a ni. Mizoramin MP fel tak tak kan lo nei tawh thin a, chutih laiin tawng lama harsatna nei Parliament house chhunga kha chih tlat te Central Minister-te dawr kawnga harsatna neite pawh kan lo awm tawh thin a ni. Pu Richard-a hi MP tha tak a nih ka beisei a, kohhran leh khawtlanga a inhmannate hi a chhuanawmin, ram rawngbawlna kawngah pawh theih tawpa ke pen tur mi leh Budget piah lama, Central sawrkar hnuaia scheme hai chhuak thei turin kan ring tawk a ni," a ti.

ZPM Leader chuan, "Mizoram mipui min tawngtaipui thin tute pawhin thahnem ngai taka kan MP candidate min vote pui theuh turin kan sawm cheu a, ruling party mi ngei MP kan neih chuan Mizoram sawrkar nen pawh hmasawnna kawngah thawhho a nuamin thil tih a awlsam dawn a ni,” a ti.

Chief Minister chuan sawrkar hmasa hnuaia contract hna thawh chungchang sawiin,”Hna zawh hun tawh, la zawh loh tam tak a awm a, tin hna thenkhat contract semsawm lutuk avanga hna chhe tak tak hmuh tur a awm nual bawk. Heng hna thalo te pho chhuaka thuneitute beng a thlen theih nana min thawhpui zel turin mipui leh NGO te kan sawm a ni, tun hnaia video viral chungchangah pawh Vaisam YMA hruaitu pakhat thahnemngaihna zarah thuneitute beng a lo thlenga a chungah pawh kan lawm hle a ni,” a ti.