Mizorama Kohhran member ngah bera ngaih Mizoram Presbyterian Kohhran (Synod) chuan hlamzuih awm tawh lova, mitthi dang ang bawka kalpui turin ruahmanna a siam nia hriat a ni a. Hetih lai hian, khawtlang anga chhiatni thatni-a veng tina a kul a taia che chhuak ber thin chu YMA an ni thung a. Tunhnaia Central YMA thuneitu sang tak, Central Coordination Committee (CCC) chuan 'Hlamzuih-a thi sawngbawl dan chu YMA-in a kalpui dan pangngaia kal nise' an ti a ni. YMA hian 'Hlamzuih' a hrilhfiah dan hi nausen, a piantirh atanga thla thum thlenga upa te niin a lang a, hei hi hun rei tak atang tawha Mizoten an lo kalpui tawh dan nia sawi a ni bawk. Kohhran lamin Hlamzuih tihbo duha hma a lakna leh YMA kalpui dan hi a inhne rem dawn ta lo niin a lang. Kohhran lam thlirna atang leh Kristian nihna atanga thlir chuan 'Hlamzuih' hi kalpui chhunzawm zel chi niin a lang lo a. Nu in thla 9 chhung hrehawm takin a pai a, naute a lo pian chhuah nan nu in na tak a tuar a ngai a, thla 3 pumhlum hmaa a boral/thih avanga holam taka phumbo mai ang chi hi Kristian ramah chuan thil tih awm loh tak a nihna chen a awm theiin a rinawm. Hetih lai hian, thihna chungchanga a kul a taia tang thin, mitthi lumen leh khawhar in riah, buhfai khawn, mitthi kuang, thlan laih te leh chhiatnia insawngbawlna kawnga YMA lam tha thawhte ngaihtuah hian, 'Hmanzuih' awm lova mitthi sawngbawl dan pangngai veka YMA a chet chhuah a tul dawn a nih chuan thil buaithlak tak a nihna chen a awm thei dawn a, hei hi Kohhran lam pawhin a hriatpui a ngai be bawk ang. Kohhran thenkhat duhdan anga 'Hlamzuih' awm tawh lova mitthi pangngai sawngbawla insawngbawl hi Kohhran lam hian tlinah an inngai a nih chuan tuten emawa lo dodal ngawt chu a rem chiah lo thei a, amaherawhchu, mihring nunna hlutzia te ngaihtuah erawh chuan Kohhran chuan a tihtur dik tak a ni maiin a lang. Mitthi reng reng, nausen piang hlim pawh nise, a nunna chu puitling dangte nunna aia a nepna a awm chuang lo. Chuvangin, mihring ve tho a nihna piah lamah, a hringtu nu dinhmun thlenga ngaihtuahchuan, holam taka phumbo mai chu a na hle ang tih a rinawm a ni. Hlamzuih hi pi leh pu hun atanga kalpui tawh pawh ni sela, Kristianna enga awm tawhte tan chuan kalpui chhunzawm zel chi ni pawhin a lang tawh lo a. Kohhran hian tul leh tha nia an hriat anga an kalpuina kawngah YMA nen indipdal lova kalpui dan ngaihtuah a tul hle niin a lang. Thlanmual enkawltu chu YMA lam an ni deuh tlangpui a, tlan laihna bungrua leh kuang bakah tul dang zawng zawngte pawh YMA lam kutken a ni tlangpui bawk. Hetih lai hian, Kohhran member tamtak hi YMA member tho an ni a, chuvangin, Kohhran duhdan nena indipdal lo tura thawhho dan kawng ngaihtuaha remruatna tha zawk siam ni thei se a duhawm hle a ni.