Aizawl May 15, 2024 : Central YMA chuan Mizoram Board of School Education (MBSE)-in May 14, 2024 (Thawhlehni)-a High School Leaving Certificate (HSLC) Result, 2024 tluang taka a ti chhuak thei chu lawmawm an ti a, a hun taka Result chhuah a nih theihna tura thawktu MBSE-te chungah lawmthu an sawi a ni.

HSLC Result chhuakah zirlai 13,618 (73.37%)-in hlawhtlinna an chang hi lawmawm an ti a, zirlai pass zawng zawngte an lawmpui tak zet a ni. An zir leh zelna turah ram leh hnam rilru pu chunga chhunzawm zel turin duhsakna an hlan bawk a ni. Tun tuma hlawhtling ve ta rih lote pawh hnual mai lovin theihtawp chhuah zel turin an ngen bawk.

CYMA chuan, "Nikum Result aia 2.23% laia zirlai Pass an tam zawk te hi hmasawnna lawmawm tak a ni a, hetiang a thlen theihna tura thahnemngai taka thawktu, Zirtirtu leh thawktu zawng zawngte chungah lawmthu kan sawi a, kan ram zirna in hma a sawn zelna tura theihtawp chhuah zel turin kan inngen bawk a ni," an ti.