ZALEN September 7, 2026: Vawiin khan CM Conference Hall-ah Chief Minister Lalduhoma leh Adviser to CM (Finance & Planning) TBC Lalvenchhungate hriatpuiin Finance Department leh Mizorama Bank pariatte chuan One Department One Bank kalpuina tur inremna an ziak.

Chief Minister chuan Comptroller & Auditor General of India Audit Report-ah sawrkar sum tam tak hi DDO te Account-ah Finance Department hriatpui lo va dah a nih thin thu a lang thin a. Chung account-a sum dah (park) te chanchin hriat tum chuan Finance Department hian Department te a zawt thin a. A duh ang taka a hriat zung zung theih loh changte a awm thin. Chutiang harsatnate kan tihbo a, tha zawka sum endik hna kan thawh theih nan One Department One Bank hi kalpui tum a ni, a ti.

Department pariatte nen kan han kalpui phawt ang a, a tul dan a zirin kan pek belh zel ang che u. He hmalakna hi sum leh pai enkawlna kawnga hmalakna thar, langtlanga sawrkar sum leh pai enkawlna kawnga puitu, tha zawka a endik hna (monitoring) thawhna tur a ni a. Min thawhpui tura inpeih bank-te chungah pawh an lawm hle a ni, a ti.

Mizoram CD Ratio a hniam bik thu pawh sawiin ram pum chawhrual (National Avarage) a phak lo hle a. Hmarchhak bialah pawh kum 2025-26 ah Assam chu 73.52% a ni a, Nagaland chu 61.1% a ni a, Tripura chu 61% a ni a. Mizoram chu 55.83% chauh a la ni. Mizoram CD Ratio hi 2028-29 ah chuan 67% tal nihtir kan duh a, bank-ten tan inlak a tul hle a ni, a ti bawk.

One Department One Bank kalpui tura sorkarin inremna a ziahpui Bank-te chu:

1. State Bank of India

2. Mizoram Cooperative Apex Bank

3. Mizoram Rural Bank

4. Axis Bank

5. HDFC Bank

6. ICICI Bank

7. Union Bank of India leh

8. Indian Overseas Bank te an ni.

Vanlaldina Fanai, Commissioner & Secretary, Finance chuan sorkar aiawhin hming a ziak a, Bank thuneitu theuhten an hming an ziak bawk.

Heng Bank pariatte thawhpui tur hi Mizoram sorkar chuan Department pariat a thlang chhuak tawh a, chungte chu PWD, PHE, P&E, GAD including all DCs, UD&PA, RD&AD, H&FW leh IFSL te an ni a. Bank leh Department indawr tur bik hi tihfel a la ni lo va, tihfel thuai a ni ang. Scheme thenkhat sum kalpui dan (SOP) neisa an awm a, chung scheme-te chu ODOB hnuaia kalpui remchang lo a awm bawk.