ZALEN September 27, 2026: Mizorama mi mal enkawl, private hospital thenkhatten Mizoram Universal Health Care Scheme (MUHCS) an la zawm theih loh chhan chu Mizoram sawrkar nen package rate chungchangah inbiakremna a la awm theih loh vang a ni.

ZALEN thudawn danin April, 2025 atanga hman tan, MUHCS-ah Mizorama mi mal damdawi in thenkhatte tun thlengin an la tel lo a, heng zingah hian Aizawla damdawi in lian thenkhat - Trinity Hospital, Ebenezer Hospital leh Aizawl Hospital te pawh an tel.

Aizawla mi mal damdawi in neitu thenkhat chuan MUHCS chungchangah Mizoram sawrkar leh private hospital thenkhatte an la inthlunzawm loh avangin mipui an khawngaihthlak niin an lo sawi tawh a, sawrkar damdawi in chang lo, sum nei bawk si lo mi tam takte chu an awm man leh an enkawlna man chawi mang loa an admit mek thu te ZALEN zawhna chhangin an sawi.

Mi mal enkawl damdawi in thenkhatten MUHCS an la zawm theih loh lai hian MUHCS 1.0 aiin 2.0 zawmtu an pung a, general category-ah phei chuan a let aia tamin an pung.

Kum kalta khan 20,198-in an zawm laiin kuminah chuan 49,927-in an zawm a. AB-PMJAY pawh a hranpaa inziah luh ngai lo a nih avangin a danglam lo bawk.

MUHCS 2.0 hnuaiah chungkaw 49,927 inziak lut an awm a, MUHCS 2.0 hnuaiah hian sawrkar hnathawk mi 35,325 inziak lut awmin pensioner 11,928 an awm a, AM-PMJAY (Golden Card) 2,22,943 hmang an awm bawk a. MUHCS 2.0 hi mi nuai 12 velin an hmang thei dawn nia ngaih a ni

Tun dinhmunah MUHCS zawmtu hi Mizorama mi mal leh kohhran enkawl damdawi in 19 bakah Mizoram pawnah private/trust/mission hospital 52-ten an zawm tawh.