Aizawl: Chief Electoral Officer (CEO) Ashish Kundra IAS chuan nimin khan Lawngtlai tlawhin, MLA inthlanpui 2018 atana Lawngtlai District inbuatsaihna leh an dinhmun a enfiah. CEO Ashish Kundra hi Lawngtlai District Election Officer N.Chakhai chuan lo dawngsawngin Lawngtlai Bawrhsap office chamber-ah Lawngtlai District inthlan inbuatsaihna hrang hrang an thlirho a. CEO chuan inthlan felfai tak buatsaih tura tih tur hmabak la awmte chu tha taka hlen chhuah tum turin inthlana mawhphurtute chu a chah a ni. An inkawm zawh hian Govt Lawngtlai College-a strong room chu enho nghal a ni a. Vote chhiarna tur counting hall buatsaih dan leh chet vel dan tur ruahmanna te, control room leh thil tul dang buaipui ngai te sawi ho a ni bawk. CEO hian vawiin hian Bru te tana vote thlakna tur Kanhmun a tlawh leh dawn nia thudawn a ni.