ZALEN September 13, 2026 : Transport department chuan fitness fee (certificate) leh fine an ngaihthah avangin cheng vaibelchhe 35 chuang an hloh a. Leaners license diltu aiin pek an tam zawk niin CAG report-ah tarlan a ni.

Comptroller and Auditor General of India report August ni 27,2026 a Mizoram Legislative Assembly a pharh tak tarlan danin DTO Kolasib an zirchiannaah lirthei 2977 chu fitness certificate nei lo leh engmah chawi (fine) lovin an tlan tih an hmu chhuak a. Heng lirthei te hi three wheeler leh light transport vehicle 2233 bakah medium & heavy vehicle 744 te niin fee an pek loh tlingkhawm hi Rs. nuai 3536.72 a tling niin a tarlang. Audit report chuan hemi chung­changah hian tum hnih hriattirna a chhuah a, mahse he hriattirnaah hian registration ti thar tura hriattirna chauh a ni a fitness fee leh fine pe tura hriattirna a tel lo niin a tarlang.   

CAG report chuan he thil chungchang hi October 2024 khan sawrkarah hma la tura thlen a ni a, sawrkar pawhin Mizoram pumah hma la turin ruahmanna a siam a. Lirthei neitute chu an lirthei kum 15 a tlin tawh chuan a thara registration ti tur te, an document ti thar tur leh fee pawh pe turin hriattirna a ti chhuak a. Mahse hei hi an kalpui tha lovin sawrkar lam chuan enforcement staff 40 chauh an neih avangin Mizoram pum tuam tur chuan tha taka kalpui a harsa niin chhuanlam an siam a, hei hi Motor Vehicle Act leh Rules 1988 bawhchhiatna niin CAG report chuan a tarlang a. Hetianga hmalakna a awm loh avang hian lirthei 2977 ten fitness fee atan an pek tur cheng nuai 19.35 leh fine an chawi tur cheng nuai 3517.37, a vaiin cheng nuai 3536.72 chu hmuh lohin a awm niin a tarlang.

Leaners license pek chungchangah pawh thil dik lo a awm tih CAG report chuan tarlangin kum 2019-20 atanga 2023-24 inkar chhung khan leaners license dil 126790 an awm laiin leaners license pek chhuah chu 179402 a ni a, license dil aia pek an tam zawk­na hi 55771 a tling tih an sawi. Report chuan district pathum Aizawl, Mamit leh Serchhip DTO office an zirchiannaah heng district pathum a leaners license dil hi mi 84294 an awm laiin license pek chhuah 122348 a awm thung a, dil aia pek an tamna zat hi 40399 a tling a ni. Heng district pathum an zirchiannaah hian Aizawl DTO hnuaiah dan dik lova thiltih a tam ber niin a sawi bawk. 

CAG report chuan kum 2019-20 atanga 2023-24 inkar chhung hian driving license nei turin mi 67994 in dilna theh lutin mi 48744 chu test nei turin an kal a, hetih lai hian hemi hun chhung hian driving license hi 73677 pek chhuah a niin pek a tam zawkna zat hi 24933 a tling niin a tarlang bawk a. CAG report chuan driving license pek chhuah a tam zawk chhan hi chinfel loh/ khawlkhawm (back log) a tam vang niin an sawi a, mahse back log data hi sawrkar lam hian phawrh tur an neih loh avangin pawm theih a ni lo niin CAG report chuan a tarlang bawk.