Aizawl August 4, 2024 : Mizorama blood bank lian ber, Civil Hospital, Aizawl-ah thisen mamawhna a sang hle reng a, ni khata thisen an mamawh zat chu unit 80-100 vel a tling.

CHA blood bank-a Head of Depatment (HoD) Dr. K. Rothangpuian ZALEN zawhna chhanga a sawi danin, CHA chu Mizorama blood bank lian ber niin, Aizawl khawpui chhunga damdawi in zawng zawng deuhthaw-in an mamawh ang zelin an hnen atangin thisen an la thin a, hei vang hian thisen mamawhna a sang hle reng thin.

Blood bank HoD chuan CHA blood bank-in ni khata thisen a mamawh (an pek chhuah zat) zat chu unit 80-100 vel a tling tih sawiin, blood bank-ah thisen neih tlem deuh chang an neih thin avangin thawktute tana thlaphanawm rum rum chang a awm fo thin niin a sawi.

“Duhthusamah chuan unit 200 bawr vel awm reng thei se duhthusam a ni a, mi mal inpete bakah, pawl (college, NGO, kohhran thalai) anga thisen pek kan intihhmuh chho zel a, hei hian nasa takin thisen mamawh a phuhruk thin,” tiin blood bank HoD chuan a sawi.

Dr. K. Rothangpuia chuan Health Minister Lalrinpuii hmalaknain thisen var lakna khawl lei tum mek a ni tih sawiin, hei hi a hlawhtlin hunah chuan a tangkai dawn hle niin a sawi bawk.

Mizoram State Aids Control Society (MSACS) chhinchhiah danin financial year 2023-24 chhung khan Mizoramah thisen unit 35,619 pek a ni a, chung zinga 32,493 chu a thlawna pek (voluntary donation) niin 91.22% a tling.