Sumdawnna kawnga khawpui inhal trhin, infiamna muala inhaw zuita Manchester United leh Liverpool chu zanin dar 9:00 hian Old Trafford-ah an inkhel dawn.

Team pahnihah hian tun dinhmunah Red Devils lam dinhmun hi Reds ho aiin a duhawm rih zawk a, United hi tunah point 67 hmuin Premier League-ah pahnihna an hauh mek a. Anni aia point 13 zeta hnufual leh parukna awm mek Liverpool tan umphak an har tawh ang.

United hian an inrintawkna tichak zual turin Ningani zan khan Europa League-ah AS Roma an sawp a, final lut turin an dinhmun a tha rih hle. Tun season hian champion lai annih theihnghilh thak khawpin Reds lam hi an talbuai a. An puja a fuh lo laklawhin khelh 33-ah point 54 chauh an la khawl thei. An khelh chhiat piah lama player inhliamin a tihbuai Reds hian season thara UCL an khelh duh dawn chuan zanin hian an chak ngei a ngai thung ang. Buaina zangkhua a bungbu Zangkhua hian thil tha lam chauh a bungbut chhuah pui lova, tun hnaa Liverpool hmaa a bungbut dan hi chu buaina zangkhua a tihtheih awm e.

Buai belhchhah turin Champions League-a Real Madrid nen an intum tumin an centre-back Nat Phillips a inhliam a, Virgil van Dijk, Joe Gomes leh Joel Matip te inenkawlna dawhkan a tawm rih a ngai dawn bawk. Phillips aiah hian Rhys William a luh mai a ngaih hmel.

Annih loh pawhin centre-back ah hian Fabinho a din a ngai maithei bawk. Inhliam tam hle mahse, mual lut thei player an kawl te hi thlamuanpui tham an la nei. Season hmasaa an ropuina phaklo Salah, Mane, Firmino leh Jota te thiamna hi chu sawi nep a har a, mual chhunga an chet dan erawhin an ropui lutuk loh zia a lantir thung. Jota hian a game khelh hnuhnung pangaah goal a la khung miah lo.

Duh thlang thei Ole Zanin hian Europa League semi-final second leg-a Roma nena an game khelh tur thlir chungin Solskaer chuan a naute a duh danin a rem theiin a rinawm. A hman thiam Fernandes, GreenWood, Pogba, Rashford te an dam kim a, hliam thar awmlo mah se inhliam vanga hun rei tak chawl tawh Anthony Martial leh Phil Jones te erawh zanin hian anla inlan theih a beisei awm loh.

Klopp tana mual sakei German pachal Klopp hian Liverpool tan hna ropui tak vawi tam a thlen tawh a, UCL leh Premier League trophy a chawipui tawh bawk. Fak loh rual ani lo. Hetih lai hian, Klopp hian Old Trafford-ah chak hmel ala hmu lova, club dang laka a them thiamna leh a dawi bur hman hman thiam chu United khel mualah chuan a hman tlak leh loh thin.

An hmelma hlun United mualah hian a naute tum 6 luhpui tawhin chak ala nei lo. An game hnuhnung 5 An game hnuhnung 5-ah Reds hian draw vawi 2, chak vawi 2 leh chak loh vawi 1 an nei. United hi tum 4 chakin Leeds United an draw. Boss pahnih te kam chhuak Klopp chuan, “Kan game hnuhnung vawi 3-ah chance 36 kan insiam thei a, goal erawh vawi 2 chiah kan khung thei. Goal thun kawngah season hmasa tluk phaklo mah ila, ka naute hian an thiam erawh anla theihnghilh lo tih a chiang. Hmasawn turin theihtawp kan chhuah a, result duhawm kan neih ngei ka beisei,” a ti. Sawi zawmin,“Kan game hnuhnung 7 en hian, team vanduaina kan ni satliah lova, hmasawn ngai kan nih a lantir a ni. Zanin a kan tum tur United hi tun hnaiah an khel tha a, hneh tur chuan theih tawp kan chhuah a ngai ang,” a ti.

Season thara UCL khel tura dinhmun tha leh Europa final lut mai theia ding mek Solskjaer chuan, “Tun dinhmunah chuan kan player te an dam tha thawkhat a, mahse Pathianni zingah tute nge Liverpool hmachhawn a, mual chhung lut tura player fit tih chu a chiang chauh ang,” a ti.