Mizorama Chakma te pun dan hi pun dan phung pan-gngai ni theia alan loh avangin Central YMA chuan CHAKMA CHHIARPUI neih a tum ta a, NGO thenkhatte pawhin an thlawp chho ta zel a. Hetihlai hian Opposition Party-te pawhin an thlawp thu an chhuah ve mek bawk a. Central YMA hian a nghawng theihte chhut lawk vekin Chakma Chhiarpui hi neih an rel ang tih a rinawm a. India sawrkar thiltih mak: Mizoram chu India sawrkarin Mizote remtihna tel lova awp lui nia ngaihna leh an enkawl dana lungawi tawk lohna te, hetiang ringawta an awm zel chuan an chhehvel hnam lian zawkten an chimpil mai dawn nia hriatna avangin, Mizoram chuan mahnia ro inrelna (Independence) turin 1966 March atangin Independence Movement a kalpui ta a. He Movement hian Mizo mipui tam ber thlawp a hlawh hle a. Tharumin India sawrkar chu hneh lo hle mah se, Mizo mipui rilruah chuan dinhmun sang tak a chang si a. Independence Movement doletna tur atan, ‘Thendarh la awpbet rawh’ tih Policy chu India sawrkar hian Mizoram-ah a rawn hmang ta a ni. India sawrkar hruaitute chuan ngun taka ngaihtuahna hmangin North Eastern Area Re-organisation Bill 1971 chu Parliament-ah an ‘passed’ ta a. Mizoram chu District Council atangin Union Territory-ah hlankai a ni ta a. District pathum - Aizawl District, Lunglei District leh Chhimtuipui District-ah te then a ni a. Aizawl leh Lunglei District-te chuan District Council an nei loh laiin Chhimtuipui District chuan District Council pathum a nei ta thawt mai a ni. India inpumkhatna daltu nia mi thiamten an hmuh chhuah, chibing hminga District etc. hming vuah loh tur a nih laiin Chhimtuipui District-a District Council hmingte chu hnam hming - Pawi, Lakher, Chakma District tiin an vuah ta a ni. University mi thiamte chuan Mizorama India sawrkarin Administration a kalpui dan hi a la mak ber, Mizoram District pahnihin District Council an neih loh laiin, District pakhat chuan District Council pathum a nei thawt mai a ni. Chu pawh tihphung kalhin hnam hming a la puttir a ni tiin, khawvel inawpna mak berah an sawi hial a ni. Bangladesh War avanga North East State tuarna: India sawrkar Indira Gandhi hruai khan ‘Foreign Policy’ ropui deuh a chhawp chhuak a. An thenawm ram Pakistan chu East Pakistan leh West Pakistan tia hriat thin a ni a. East Pakistan chu hnehlaka awp zui a tum a ni. East Pakistan lakhran tuma beitu hruaitu, Mujibur Rahman chu ‘Remna Thuthlung’ (Indira Muji Pact) chu a siampui a. Chu Thuthlung (Pact)-in a tum ber chu ‘Bangladesh a lo pian chuan Bangladesh mite chu India ramah zalen takin (Passport ngai lovin) an lutin an duh chuan an cheng hlen thei ang. India mi pawh Bangladesh-ah zalen takin an lutin an duh chuan an cheng hlen thei bawk ang’ tih a ni a. Bangladesh War chu 1971-ah a lo chhuak ta a. A tira a bul tantu anga lang chu Mujibur Rahman leh a thuihruai ‘Mukti Bahini’ an ni a. Hei hi chu khawvel laka thiam channa atana India sawrkar remruatna mai a ni. Ruatlawk angin Mujibur Rahman te chuan India sawrkar Indira Gandhi hruai hnenah tanpuina an dil ta a. India sawrkar chuan i he lovin thapui thawhin a beihpui ta a, Pakistan chu a tlawm ta a; mahse, Bangladesh ram hmangaihtu (Nationalist) te chuan Mujibur Rahman chu an kaphlum a, Bangladesh-ah chuan Indira Muji Pact chuan awmzia a nei ta lo a ni. Chakma Refugee: He indona avang hian East Pakistan Bengali tam tak chu an dep India ram Tripura, Assam etc.-ah an rawn raltlan ta a. Heng ho zingah hian Chakma tam tak raltlan an awm bawk a ni. Mizoramah tam tak an rawn tlan lut a. Raltlan an nih avangin Refugee anga lo enkawl tur an ni. Khatih laia Mizoram District Council hruaitute khan rambuai kan nih chhuanlamin ‘Refugee’ lo neih rem lo tiin thiam takin an lo hnar avangin, Chakma Refugee tam tak chu Arunachal Pradesh-ah thawn an ni ta a ni. Mahse, Mizoramah Chakma awmsa eng emaw zat an lo awm ve avangin tam tak chu Mizoramah an chambang a ni. Mizoram District Council hotuten Refugee an mikhual theih loh avang khan, Mizorama chambang tate kha chhinchhiah an ni lo va, tualchhung mi awmin an awmzui ta zel a ni. Kan Council hotute khan fing takin Refugee-te kha lo hnar lo se chuan, vawiinah hian mikhual cham hlen kan ngah ngawtin a rinawm a. Kan hotute kha an chhuanawm hle a ni. Indira Muji Pact leh North East: Bangladesh indona avang khan Mizoram mai ni lo, kan thenawm state-ah te hian ‘Raltlan’ tam tak an lut a. Assam zirlaiten foreigner-te thawn kir tura nasa taka an beih avanga Central sawrkar nena remna zawnga an inbiaknaah khan India sawrkar chuan foreigner-te thawn kir tur kuma bithliah (Cut off Year) siam nan ‘Indira Muji Pack 1971’ kha tanhmunah an hmang a. Khatihlai khan North East Region Students Union (NERSU)-ah Joint Secretary ka ni ve a, an thu haw lam leh kal lam thu ka hre ve nial nual a ni. Assam zirlai, All Assam Students Union (AASU) te khan India Constitution an tan chhan thung a. Kan ram Prime Minister ten ‘Pact’ an lo siam hi Constitution ai hian a pawimawh zawk dawn em ni? Tunhmain ‘Poona Pact’ etc te a lo awm tawh a, tunah hman zui a nih kan hre tawh lo va. India Constitution-ah chuan ‘Mi tupawh 1950-a India chhiarpuia inziak lut leh an thlah kal zelte chu India mi an ni ang a, a hnua lo lutte chu ‘Foreigners’ an ni tih a ni a. Chuvangin, ‘Cut off Year’ atan hian India Constitution hi kan hmang tur a ni dawn lawm ni an ti a ni. I fimkhur ang u: Tuna Chakma chhiarpui kan neih tur hian eng nge nghawng chhuak se kan tih ber tih hi ka hre lo na a. Chakma an ni emaw, eng hnam pawh nise, India khua leh tui dik takte finfiahna tur a nih ngei ka ring a, ka beisei bawk. North East State tam berte hi chu chimral mek an ni a. Kum 2011 Census-ah khan Manipur state-ah nuai 25 an awm a. Manipuri nuai 7.5, Plain mi 7.1, a dang zawng chu Mizo hnahthlak leh Naga hnam peng hrangte an ni. Mizoram chiah hi North East-ah chhanchhuah tlak awm chhun kan ni tawh hial awm e. Central YMA hmalakna hian rah tha tak a chhuah theih nan fimkhur takin hma la sela. Chakma nawlpui duh lo anga kan lan chuan India Danpui hian Minority-te humhalhna dan tha tak a nei a. Kan tum loh ram hi kan dai palh hlauh a nge. Chakma unaute pawh hian foreigner a ni dapchhuah tur ni, India khua leh tui tan chiai vena tur a awm lo tih hria se. Mizoramah thlamuang tak leh inngeih tlang taka kan awm ho hi a tute tan pawh a tha ber tih hi ka sawi ve duh a. He chhiarpui neih tur hi YMA mai ni lo, sawrkar ngei hian tha tak leh mumal takin kalpui thei sela, chu chu mipuiten kan tawiawm ang a. Sawrkar chuan a ram mipuite him nan te, Development a semrual theih nan te, ama khua leh tui dinhmun a hriatchian hi a tih tur ve reng a ni si a. Mikhual engzat nge kan neih tih hre lova eirawng a bawl mai chuan a mualpho tur chu amah tho a ni. - ZOSANGLIANA (ZOTEA)