Euro 2020-a an tlak atangin ni 28 a liam a, Tottenham lama loan hmanga a chhuahna ni 309 a liam chiah bawk tihin a club Real Madrid lamah cham rih tawh turin Gareth Bale chu a kir leh ta.

Real lamah tun season chiah hi Welsh forward hian contract a nei tawh a, man to taka lei chhuaktu leh hlawh tam tak petute hnenah ngei a season tawp hmang turin a kir leh ta a ni. 

A hlawh tam ngaihtuaha khelmual chhunga a chet dan kham khawp lotu Real Madrid tan chuan Bale hi buaipui tham a tling a, transfer thuthang a awm apianga an buaina an tawh thin kha tun nipui pawh hian a danglam chuang vakin a rinawm loh.  Los Blancos lam tan chuan hmun danga Bale a kal hi an phurrit chhawktu nihna chen a awm a, nikum chhunga loan hmanga Spurs lama a kal pawh kha an harsatna chhawktu lian tak a ni. 

Hliam vanga buai thei tak, Bale hi a khelhna club ten club danga khel tura an duh viau laiin amah berin a hun hnuhnung chu Real lama cham a thlang miau si.  Khelhna hmun a chang emaw chang lo emaw Real player hlawh tam ber hian tun season chu chhuah a tum lova, a hlawh tam em avang hian club dang pawhin an rim lem lo niin a lang.  

A ngeih loh ber Zidane a awm tawh dawn lova, Carlo Ancelotti hnuaiah hian Bale hian dinhmun tha a luah phak a ngem tih chu zawhna lian tak a ni thung. 

Bale leh Zidane a inkar khi awm kha chu siam that harsa deuh tawh mahse, Ancelotti nena an inkarah  erawh boruak chhia a awm hran lova, tha taka an thawhho theih a beiseiawm hle thung. 

A coach thar hrawn tur Ancelotti chuan,"Gareth hi a khel tamlo chungin goal tam tak a thun thei a, amah hi ka hrechiang a, phurna sang tak nena a rawn kir a nih phawt chuan season tha tak a hman theih ngei ka beisei a ni,” a ti.