Aizawl; Nimin piah, Zirtawpni khan Mizoram Journalists' Association, Champhai District chuan an din cham kum 25-na, 'Silver Jubilee' chu I&PR Auditorium, CHANEM Building-ah an lawm a, tlaiah Jubilee lawmna ruai an kilho. Champhai MJA Silver Jubilee lawmna huna khuallian Parliamentary Secretary TT Zothansanga chuan chanchinbumite hi an pawimawh a ni tiin, "Chanchinbu thuziak hian a tha zawng leh a chhe zawngin khawvel hi a kaihruai thei a. Chuvangin dik tak leh fimkhur taka thil kan tih thin a pawimawh a ni," a ti. Parliamentary Secretary chuan Editor ten uluk taka an vei zawngte an ziahna 'Editorial' chu mipuiin an hlut tawklo chu pawi a tih thu a sawi bawk. Khuallian hian MJA Champhai district ten an jubilee puala monument an siam chu a hawng nghal a ni. Khual zahawm I&PR Director Jim K.Chozah pawhin thu sawiin, media te hi chi (salt) ang an ni a. Chaw kan ei a, chi a tel loh chuan a kim lo thin ang hian media tel lo chuan mihring nunah hmasawnna leh bengvarna a awm lova, mihring nunphung hi media te hnathawh tel lo hi chuan a kim thei lo a ni, a ti a. Chanchinbu-a thuchhuah reng reng hi record-ah a awm tawh avangin fimkhur a pawi mawh a, thudik, mipui sawtpui tur leh thatpui tur kan chhuahthiam a pawimawh tih a sawi bawk. Anni bakah hian Champhai DC Zoengsanga leh MJA Gen.Hqrs. President C.Lalrambuatsaiha ten thu an sawi bawk. Silver Jubilee lawmna hun hi MJA Champhai district President Lalhmingmawia Pachuau in a kaihruai a ni. MJA Champhai district hi December ni 31,1988 chawhnu 1:20 khan chanchinbu lama thawk mi 16 kalkhawm ten an din a ni a, a tirah chuan Champhai Journalists Association (CHJA) tih a ni a. February ni 11,2006 khan Mizoram Journalists Association ah an in chhunglut a, heta tang hian MJA Champhai distrit tih a ni ta a, tunah hian member 19 an awm mek a ni.