Aizawl August 6, 2024 : ZPM Media, IT & Publicity Department chuan Kalphung thar mipui Sawrkar hnuaiah School Education Minister Dr.Vanlalthlana hma laknain Mizoram Zirna siamthat hna thawh mek a, tun hnaiah Casual teacher High School, Middle School leh Primary School-a zirtirtu indaihlohna phuhru tur a lak bakah School building chei that ngai leh sak that ngaite pawh theih tawpin Sawrkarin a thuamtha mek a ni, an ti.

MZP Headquarters Champhai hmalakna chungchang fakin, "Ram zirna siamtha tur hian a tahtawl te te a hmalak a ngaih avangin tunah hian College hrang hranga zirtirtute indaihlohna siam rem tura zirchianna neih mek a ni a. Hetih lai hian Champhai College-a Zirtirtu indaihlohna, sawrkar hmasa hun laia MZP Headquarters Champhai hruaituten an lo thlen tawh chu tunlai hian ngenngawl zawkin sawrkar tharah beiseina sang tak neiin an duh leh mamawhnate Education minister hnenah an thlen leh mek a, ram leh khawtlang hmangaihna thinlung pu a, zirna siamthat tuma MZP Headquarters Champhai hruaitute hmalakna hi chhuanawm kan ti hle a ni," an ti.

ZPM chuan, "Mizoram College hrang hranga Zirtirtu indaihlohna rualkhai zawka siamrem tura hmalakna hi hna hautak tak mai a ni a, fimkhur taka leh thuhnu dawn taka kalpui ngai thil a nih avangin, thawk lehkhatah a tih zung zung theih loh a ni. School Education Minister hmalakna hi MZP Headquarters Champhai te pawhin dawhthei taka lo ngaichang a, mipui tana harsatna siam zawng leh Zirna tithuanawp zawnga hma la chhunzawm lo turin kan duh hle a, thil tha duhtute ve ve indawrna ah hian inhriathiam tawnna leh College bil bik harsatna thlir lova, a ram pum huap college zirtirtu indaihlohna hrethiam chunga, dawhthei taka Sawrkar hmalakna lo ngaichang turin kan duh hle a ni," an ti bawk.