ZALEN, Nov. 29, 2024: Tun kar chhung hian Champhai district-a high school zirlaite hnenah sik leh sa inthlak danglam mek zirtirna kalpui a ni.

Mizoram University leh Department of Science & Technology-National Council for Science & Technology Communication (DST-NCSTC) bultuma neih, ‘5-day Workshop on Towards a climate resilient society – Sensitization of climate change to the society through the intervention of visual art in Mizoram, India’ thawh lina hi Thawhtanni atanga tan kha niin Zirtawpni khan zawh fel a ni a, hemi pual hian art workshop neih a ni bawk.

Zokhawthar Seconday School-a Workshop on Climate Change-ah hian MZU, Mizoram State Biodiversity Board, Gov’t Serchhip College leh Gov’t Champhai College-a mi thiam ten zirtirna an pe a. Khawvel sik leh sa inthlak dan te, a chingpen zel dante zirtir niin hemiin nghawng a neih theih dan te leh a tihziaawma inven theih dante zirtir an ni.

Nungchate inkungkaihna leh mihringten an zar an zo dan leh an dam khawchhuah nan humhalh an tulzia bakah ram leh hnam hmasawn nan leh mi dangte tanpui nana science pawimawhna te, science zir zawm zel dan leh a kalphung te zirtir an ni a. Mathematics zir dan thate kawhhmuh an ni bawk.

Zirlaite hian sik leh sa chingpen chungchanga zirtirna an dawnte hi lemziak hmanga pho lan dan zirin Mizoram Academy of Arts, Aizawla thawktute kaihhruainain art workshop an neih nghal a ni a. An kutchhuakte hi MZU-a art exhibition neih turah vantlang en theih tura pho chhuah a ni ang.