Kum li zet UFC a chhuahsan hnuah, hmeichhe lama bamtamweight division champion pawh lo ni tawh Miesha Tate chuan UFC lama luhchilh leh a tum a, ruahman dan chuan July ni 18 hian Marion Reneau-i a hmachhawn dawn a ni. 

UFC hmeichhe fighter hmuhnawm ber zinga mi Tate hi UFC a chhuahsan chhung khan a awm maimai bik lova. MMA promoter ONE Championship lamah inhnamhnawihin vice-president dinhmun a chelh nghe nghe. 

UFC a chhuahsan dawn khan Tate hi a chetha vak lova. A fight hnuhnung pahnihah Amanda Nunes leh Raquel Pennington-i te lakah a tlawm ve ve a ni. Tate-i hian fight 18 hmachhawn tawhin vawi 7 a tlawm tawh a ni.

ESPN hnenah Miesha Tate, kum 34 hian UFC lama a kir tur thu hi a hrilh a, bantamweight-ah tho veteran Marion Reneau nen an inhmachhawn dawn a ni. An inbeihna tur hmun hi sawi chian la awmlo mahse, anni pahnih fight tur hian UFC fight night card chang tura rin a ni. He an fight hi a tumpui tur kum 43 mi Reneau-i tan fight hnuhnung ber tur a ni thung ang. Reneau hian MMA record a nei tha lutuk lova, fight 9-ah tum 7 zet a tlawm tawh a ni.