Champhai Grape Grower Society leh R&R Sales, New Delhi-te chuan inremna ziakin grape tui an inleisak dawn.

CCN news in a tarlan danin, Zirtawpni khan Champhai Grape Growers Society leh RR Sales, New Delhi te chuan sumdawnna atan ah thawhhona ‘Agreement’, New Friends Club, New Delhi ah an ziak a, inremna an ziah dan chuan R&R Sales, Delhi hian Champhai Grape Grower Society siam chhuah Champwine an lei ang a, Delhi-ah an zuar chhawng dawn a, an leisakna tur zat erawh hi chu a phurh man leh chhiah chawi ngai zat a zirin an inbe tha leh dawn a ni.

Inremna thuthlungah Champhai Grape Growers Society aiawhin Hrilchunglura, General Manager leh V. Lalrindika, Director leh Ranjit Goel, President, Business Development, RR sales te’n hming an ziak a ni.

Tunlai hian Champhai Grape Grower Society-te hian Grape chingtute hnen atangin grape rah an lei mek a, vawiin thleng khan Qnt. 610.29 an lei tawh a, grape rah hi Kg-ah Rs. 60-in an leisak a ni.

Grape tui an sawrna hmunpui Tlangsam Winery-ah hian grape tui sawr sa um-a la khung loh litre 70,000 leh champwine case 400 an la nei mek a, heng champwine-te hi sawrkarin phalna a pek angin vendor-te hnenah an hralh chhuak thin a, R&R Sales nena inremna an ziah tak avang hian a hralh chhuah kawnga harsatna an tawh thin tam tak chu a sutkian ngei an beisei tih winery hotute chuan an sawi.