Aizawl: Mithiam te chuan chanchinbu leh pawisa atanga Covid-19 kai hriat tur an awm mang lo tih sawiin hri inkaichhawnna ber chu ka leh hnar atangin a ni tih an sawi.

Health Department Director hlui Dr. Lalbiak Kima chuan paper lam chi-ah Covid-19 inkaichhawn a hlauhawm loh tih Zalen hrilhin, "Pawisa, chanchinbu leh thawmhnaw atanga kai hi a hlauhawm loh tih khawvel pawm dan a ni a, paper lam chi ah hian awm pawh nise reilote chauh a dam thei a. Mizoram chauh hi paper leh pawisa atanga inkaichhawn hlau kan ni a, pawisa (note) khawih atanga kâi phei hi chu report a la awm lo a ni," a ti. Dr. Lalbiak Kima chuan Covid-19 thawh khatna (1st wave) ah khan chanchinbu atanga kai an awm lo tih sawiin, "Kan kaina ber chu kan inkawm ho/khawsak ho (direct contact) atangin a ni a. Medical Operational Team ten Aizawl khawpui veng 14 an zirchianna ah pawh inhmuh zawk, pawisa inpek, kuhva intheh tih vela kai an awm lo a. Chenhona emaw positive te nen minute 15 tal chaw ei ho/ inkawm an ni deuh vek a ni," a ti bawk.

Dr. BKA chuan Containment Zone chhunga hrikai hmun thuma thena hmun hnih vel hi chu inchhawng,  a chung leh hnuaia khawsa, inkal pawh awl tak an ni hlawm tih sawiin, "Fimmkhur taka double facemask vuah leh kut tifai tha zingah kai an awmin a lang lo a. Mahni chenna in, thenawm hnai leh veng te nen kan chenna ah hmaituam, kut tihfai leh inkâr hlata awm (Covid Apppropiate Behaviour) kan vawn that loh chuan hrikai hi kan pung zel ang," a ti bawk. ZALEN zawhna chhangin Dr. Lalbiak Kima chuan tunhnaia positive an tam chhan chu mass testing tih har vang a ni tih sawiin, "Mass testing hi tih nilo se chuan Covid-19 vei tih inhrelova leng mai mai an tam dawn a, chu chuan mi tam tak an kaidarh thei a. Tun dinhmunah chuan test hi a tam thei ang ber neih nise a tha hle," a ti bawk.

Indian Medical Association, Mizoram State Branch President Dr. Rosangluaia pawh  in chhuichianna atanga a lan danin Covid-19 hri inkaina hi kut khawih atangin a ni lemlo niin a lang a ni tih Zalen a hrilh bawk a. "Pawisa leh chanchinbu atang hian a kai theih loh tih chu a awm lemlo nain heta tanga kai sawi tur an tlem hle a. Covid-19 kaina ber chu inthawkkhum leh intawngkhum atangin a ni a, chuvangin ka leh hnar tuam that hi a pawi mawh ber a ni," a ti bawk.