India-a space agency Isro chuan thlaa a kah kai lander leh rover te chu ni chhuak leh tawh mah se a la kai tho zo rih lo tih a sawi a, an hnen atangin signal engmah a la dawng leh thei rih lo.

A dula thlaa teihawi tur, rover kengtu, thla leilunga tumpuitu, lander hi August thla khan la tlawhpawh tam loh tak, thla chhim tawp hnaih takah him takin a tum.

Thlaa thil pawimawh hrang hrang (data) leh thla la kualin chawlhkar hnih hun an hman hnuah zan a nih tak avangin ‘mut hahdamtir’ an ni.

Isro chuan an battery-te chu intinung (recharge)-in September 22 vela thlaa ni a chhuah leh hunah kaih thawh zawh ngei an inbeisei.

An tum ang erawhin thil a la thleng lo va, thlaa zan khaw vawt vin takah an battery-te chu dam leh theih beiseina a tlem ta hle.

Zirtawpni khan Isro hian X-ah ‘Vikram lander leh Pragyaan rover biakpawh hi la tum chhunzawm zel a ni’ tih an tar lang.

Space agency hian an hmanraw tirhte thlen chin, chet velna leh thlalak an thawn lette chu khawvel hmuh turin an pho chhuak char char zel.

An mut hahdamtir tirhah pawh khan Isro hian an thil kah chhuahte chuan tih tura tuk sa zawng zawng an tikim hman vek tih an sawi a, thlaa ni a chhuah leh hunah an thawh leh theih an beisei tel bawk.

Mi thiamte chuan China-in Chang’e4 lander leh Yutu2 rover a kah chhuahte pawh zanah chawlin vawi eng emaw zat chhunah kaih thawh an nih thu an sawi thin.

Hetih lai hian Isro chief lo ni tawh thin, AS Kiran Kumar chuan hetiang ngawt hi thil a nih vek theih loh thu a sawi a, thla chhim tawpa zan khaw vawh lam hi -200°C leh -250°C inkar zet a ni a, hetianga dam khaw chhuak tur emaw, an tha (energy) neih khawl reng thei tur khawpin an battery chu duan a ni lo tih BBC hnenah a sawi.

Isro chuan biakpawh tumin la bei reng mah se Vikram leh Pragyaan te hi an kai tho zo ta lo a nih pawhin thlaah hian ‘India ram palai’ atan an awm reng tawh dawn tih an sawi.

India hian thlaa a khawl tirh mekte kai tho zo tawh lo mah se Chandrayaan-3 mission tia a hming a vuah hmanga beihpui a thlakna hi khawvel bung thar kaitirtu a ni tawh tho va, thla chhim tawp hnaih taka thlalem kap kai thei hmasa ber a ni tawh tho tho a ni.

Thlaah hian khawvel ram ropui tak tak - US, Soviet Union leh China te inkap kai tawhin heng ramte hnungzuitu a ni thei ta bawk.

Thla leilunga a inkah kai hi a hma atanga uluk taka duan a ni a, thlaa ni a chhuah hun (chhun)-a tum tura duan a nih anga tum a ni a. Vikram leh Pragyaan te hian khaw engah chawlhkar hnih zet an tum angin hna an thawh theih phah.

Khawvela thla khat hi thlaa ni khat ang a ni a, chhun leh zan hi khawvela ni 14 vel ve ve tihna a ni.