Aizawl: Mizote kût ngaihsan leh hriat hlawh ber Chapchar Kût chu kumin hian ni hnih chhung hman tum a ni a, kumin kût thupui (theme)-ah ‘Zofate inpumkhatna’ tih hman a ni dawn.   Kumin Chapchar Kût-ah hian kum danga la tih ngai loh, Zofa zinga mi chhuanawm leh chawimawi tlak te chawimawina hun hman tum a ni a. Ram dang USA, England, Israel, Bangladesh, Thailand, Myanmar, Korea, Japan, China, Bhutan ram palaite lo tel tura sawm tum a nih bakah Tripura, Shillong, Manipur leh Haflong YMA te tel tura sawm tum an ni bawk.   February 25-28, 2019 chhungin office kal te chu Mizo hnam thuama inchei tura ngenin February 28, 2019 zing karah Kût Rûn buatsaih tum a ni.   Kut lawmna atan hian Lunglei district tan nuai 5, district dang zawng tan nuai 3 bakah Delhi, Kolkata, Mumbai, Guwahati, Bengaluru leh Shillong Mizoram house-a kût lawmna atan cheng nuai 2 theuh pek tum a ni bawk.