In kang Ni 24.12.2018 (Thawhtan) zan dar 1 vel khan College venga K.Lalthianghlima in chhungkaw 4 luah lai chu a kang a, bungrua engmah chuh hman lohin in hi a kang ral a ni. In neitu Pu K Lalthianghlima ten a chung ber luahin a hnuai lam hi Thiak khaw lam mi unaua awm leh Tlangpui khaw lam mi lehkha zir leh tul dang vanga Aizawla awm ten  an luah a, in hnuai lam luahtute hi an khaw lama Christmas hmang tura an hawn lai a ni.In kan chhan hi chiang taka hriat ni lo mahse, inhnuai lam luahtu zingah broiler ar vulh an awm a, chumi atanga current kal sual avanga kangmei chhuak a nih an ring. Krismas Ni 25.12.2018 khan khawvel pumah Kristian te ni pawimawh Krismas hman a ni a, Aizawl leh Mizoram hmun hrang hrangah pawh he ni hi urhsun taka hman a ni a. Kohhran engemaw zat chuan a lawmna ruai an theh a, Kohhran tam ber chuan chhang ruai nen he ni hi an hmang. Ruai theh Krismas lawmna kal zelah ni 26.12.2018 (Nilaini) khan District hrang hrangah Kohhran tam zawkin ruai an theh.Aizawl khawpuiah chuan Kohhran hrang hrangin boruak muanawm tak hnuaiah hlim takin Krismas ruai an kilho. Chil hlum Lianmawia (40) h/o Chuailopari, Bairabi Hmar veng, Rail Crossing bula cheng chu ni 25.12.2018 zan dar 8 vel khan Ramnathpur, Hailakandi District-ah Bairabi pana tlan relin a chil a, a hmunah a boral. Vuiliam Krismas hma ni Urlawknia, Tahan bul luia tla hlum Lawngtlai naupang pahnihte ruang chu chu ni 26.12.2018 khan Lawngtlai Bazar Veng-ah vuiliam an ni.Vanduaina tawk hmeichhe naupang pahnihte hi Vanlaldinpuii d/o Nangzakapa leh Zirsangpuii d/o Sangrikhuma te an ni a, an chhungte nen Tahan-ah Krismas hmang turin an kal a, Vaphai luiah chengin an chesual ta a ni. Tlawh Health & Family Welfare minister Dr. R.Lalthangliana chuan ni 27.12.2018 khan Falkawna State Referral Hospital a tlawh a, Excise & Narcotics Department Minister Dr. K.Beichhua, Aizawl South-III bialtu MLA  F.Lalnunmawia, Dr. F.Lallianhlira, Principal Director, Health & Family Welfare leh Dr. T. Lalhmangaihi, Director, Hospital & Medical Education ten an tawiawm a, State Referral Hospital a Medical Superintendent Dr. Lalhmuchhuaka leh a thawhpuiten an lo dawngsawng a ni. Enfiah Ni 27.12.2018 khan Chief Minister Zoramthanga chuan Khamrang dunga National Highway 54 siamthat tur chu PWD hotute nen a hmunah an enfiah a, Chief Minister hi Information & Public Relations Minister Lalruatkima’n a tawiawm a ni. Chawimawi Ni 28.12.2018 khan Ramhlun Venglai Local Council leh Joint NGO chuan an veng pa Chief Minister a thlan tlin Zoramthanga lawmpuina leh chawimawina an nei. Tarchhuak Kum thar January ni 1 a kum 18 tling turte leh thun belh leh paih ngai te puala electoral roll siamthatna tur atana vote nei hming chu ni 28.12.2018 khan tarchhuah a ni a, Mizoram pumah vote nei mi 77,563 an awm. Enfiah Aizawl khawpui traffic jam tiziaawm tura hmalak dan tur ngaihtuahin Chief Minister Zoramthanga chuan ni 28.12.2018 zing khan Vaivakawn leh Bawngkawn junction a enfiah. Chief Minister hi I&PR Minister Lalruatkima leh AMC Mayor P.C. Lalhmingthanga bakah AMC leh Local Council hruaitute leh PWD leh UD&PA department hotulu ten an tawiawm a ni. Hmanpui Ni hnih chhung awh tur National Conference on Waste to Energy Conversion (NCWEC-2018) hawnna chu ni 28.12.2018 khan Hotel Floria-ah neih a ni a. Higher & Technical Education Minister Dr. R. Lalthangliana chu khuallian a ni. National Conference hi Department of Mechanical Engineering, NIT Mizoram leh IIT, Guwahati tangkawp buatsaih a ni. Thi Thu ziak thiam Mafaa tia hriat lar, H.Lalrinfela (43) Tlangnuam veng chu ni 30.12.2018 zing dar 5 khan zunthlum leh thisen sang vangin a thi a, hemi ni vek hian vuiliam a ni. Lunglei Area Baptist Church a executive committee member ni lai, Upa Lalduhthlana, Runtung khua chu Dec. 29 a a thingzai tirna hmun en thlithlai a a ram kal chu khâmah chesual palhin a thi a, a ruang hi ni 30.12.2018 khan mi tlawmngai ten an hmu. Tlawh Health Minister Dr R Lalthangliana chuan ni 28.12.2018 khan Civil Hospital Aizawl a tlawh a, Ward hrang hrangte tlawhin damlo hman turin HI-Tech Medical & Surgical Unit a hawng bawk.