- Dr. J.T.Vanlalngheta, LLB, D Litt D-7, Zonuam, Aizawl Chawlhniah hian kan dam lo te a nih ngawt loh chuan Kristiante chu dan naranin biak inah kan inkhawm thin a, Pathian thu kan zirin kan ngaithlaa, fellowship leh programme dang dang kan nei thin a nih hi. Heta tanga chiang em em chu chawlhni hi mipui pun khawm tamna a nih avangin kan tawng hman chu a tha a nih chuan tawng tha kan ti lar a, tawng dik lo a nih chuan tawng dik lo chu kan tilar tihna a ni. Chuvangin Pathian avanga kan inpawl khawmna apianga thu kan sawiah chuan kan theih ang angin Mizo tawng kan hman uluk a tul hle mai. Pathian thu i lo chhiar ang u: Pathian thu a ni emaw Bible a ni emaw a object-a chu eng pawh ni se kan sawi tum tak chu, “…I lo chhiar ang u,” ti lova,…”I lo chhiar ila,” tia sawi kan awm leh thin hi a pawi. Hetiang hi Mizo tawng hman dan dik lo a ni. Chuvangin ‘ I’-a bul kan tan chuan a tawpna chu “ang u” a ni ngei tur a ni. Kan sawi chu kan titawi duh emaw, a tawpa “ila” tih kan telh duh a nih chuan, “Pathian thu (Bible, Bible chang, etc) lo chhiar ila,” tia sawi mai tur a ni. Zotawng hman dan ni lem lo, hun ren nana chin atana tha ve mai mai chu (inkhawm kaihruaitu tan) kohhran mipuiten an lo hriat than tak thil a nih tawh chuan inkohna thenkhat hi chu tawngkam pumhlum lova sawi pawh a tha tho vang; hei hi hun hman that nan pawh a tangkai ang. Entir nan, “Tunah Kohhran ziaktu i lo sawm ang u/Sunday School ziaktu i lo sawm ang u,” tia sentence pumhlum nalh taka inkhawm apianga sawi ziah aiah a chang chuan, “Kohhran ziaktu,” tih leh Sunday School ziaktu” ti ngawta ding chunga sawiin. Hetiang hian Pastor thenkhat pawhin an hmang maia, a awlsam phian mai.