2005-06 khan Hnahlan lamah grape a tha duh em em a, table variety ni loin wine a siam chi a ni a. Khatih laia Horticulture minister khan tum khat chu ‘sacrament variety’ a ti a, ka nui huk leh nghal. Grape a han tam chho a, grape wine (Zawlaidi chhuah hmain), mipuiin kan duh hle mai. SRS vanglai a ni a, man a lo tul si. “Grape wine Vrs MLTP act” tih documentary film ka siam a. Pu Lianzuala khat tih laia CYMA president kan interview a, a thatzia sawiin YMA duty-te pawhin Mizoram siam grape wine chu an hrethiam ta a niin ka hria, ka thil tih vangah te pawh ka ngaih bel ve deuh. Kha tih laia Synod moderator chu Hnahlan grape wine siam chungchanga a ngaihdan ka zawt a “Ka pu, hei Hnahlanhoin grape an um a, dawidim an telh lo va, a ruihtheih tho si, engnge i ngaihdan?” ka ti a, ani chuan, “Mission compound-ah pawh kawlthei kan ngah a, ka ei seng lova, kan um a, chutiang deuhah chuan ka ngai mai,” a ti sam et. “A va han tih chi e, documentry film-ah telh teh ang,” ka ti rilru a, cameraman chu video camera kan phawrhtir a, “Ka pu, tuna mi kha min sawisak leh thei ang em?” ka ti a, “Ngaihdan ka nei lo,” a ti ta tlat mai. Nuihza angreng, nui ngam chiah si lo, engmah sawiho theih loha file min khawih buaisan tak siah chuan camera chu kan pu haw leh ta hna hna a. Grape chingtute tana tanpuina hi Prime Minister Office (PMO)-a peng pakhat, Horticulture Technology Mission [HTM] atanga dawn thin a ni. Hnahlan leh Champhai velah grape zamna tur GI wire an mamawh tawh si. Horticulture department-in HTM-a GI wire leina tur tanpuina an dil chu ‘thu a tawp e lu mam’ tih ang deuhin ‘kan pe thei lo che u, in grape hi ei chi ni lovin wine atana siam chi chauh a ni a, MLTP act in nei a, tanpuina pekin awmzia a awm lo’ an ti ta bur si. NDTV NE i/c Nitin Godkhale kan bia a, ‘Thianpa, Mizoram grape vela story a tam mai kan lo siam ang e,’ ka ti a. Mizoram grape chingtute harsatna chu National TV-ah a chuak ta chuai chuai mai. Ka tang laklawh tawh, UNI coresspondent Satya Narayan ka kawm leh bawk. Theihtawpin Mizoram grape chinga ei zawngtute din hmun kan ziak a. Horticulture deptt. hotute an tang bawk a, HTM-a grape zamna hrui tur GI wire man nuai 190 vel chu a chhuak ta hlawl mai, 50:50 chu sawi loh 90:10 pawh ni loin 100% grant vek a ni. Chu mai chu ni loin Mizoram Assembly chuan MLTP Act chu amend-in Mizo siam grape wine chu dan hnuaiah hralh chuah theihin an her rem ta. Grape kung khat pawh nei ve lo chu ka lo lawm em em ringawt a. A lawm nan ka phur thak. Chutia lawm em em ka lo awm ve lai chuan kawng dangah Grape wine phalrai khan hlet a lo nei. Rakzuah aromatic (pumpui chakna damdawi tui sen emaw, vur siamna a rawng sen te lo pawlh tawk an awm). Grape wine hmingin dawrah an zuar leh bawk. Districts Industries Centre [DIC]-ah kar 2-1 chhungin grape wine industries a mak a mak a tamin registration an lo ti bawk. Department achivement zara ka life time achievement nia ka ngaih ruk ve pawh chu a che vak dawnin ka hre leh ta. MLTP Vrs Grape Wine 2 investigative documentry ka siam leh. Grape wine hminga Rakzu rawngsen telh hla tak antangin Video camera nen chang reng rengin ka hun ka hmang leh. Ka nau Sangteii Chhakchhuak [tuna zoawi FM RJ] hian min va pui nasa tak em. DIC Aizawl lam pawhin grape wine industries registration dik loho an cancel leh ta. Tanpuina an kal chhoh leh takah chuan, Hnahlan lam pawh an thaw leh ta huaiin ka hria. Amaherawhchu, an buai namen lohin an buai ta. Grape grower society chuan grape kung 100 tal nei lo chu an society-ah tel ve an phal hauh lo mai. Tanpuina an dawng ang a, thil dangah hmangin hna grape buaipui si lovin an thirhrui dawnte an hralh mai mai ang ti. Thenkhatin ‘bultanna tur kan neih loh vangin alawm bul kan tan thei lo’ an ti bawk si. Society dang an din ve ta hmiah mai le. Grape lam tanpuina pek lahin society 2 awm ta na na na chu an inthik zel mai. Aizawl kal remchanin inhek reng rengin an khawsa ta fo mai. Horticulture Department leh sawrkar hruaitute lu an va tihai tehlul em! Society pakhat khan awm mai mai se, an taihmak theh lul nen. Sawrkar tan chhetngam loh khawin an buai kha chu a ni ber e. Inkhawmnah pawh lehlam thusawi ngaihthla a tui vak duh awm lo. ‘Society phir a din a tha lo ve’ tiin hmun khatah awm mai se tihna rilru chu hotute ngaihdam a ni ta deuh. Siam rem dan a awm lo’m ni tiin hotute tirh zingah kan tel ve leh. August ni 11, 2006 a ni a, Pu H.Zosangliana [L] Tawrh bawm editor, Pu Lalmuanpuia Punte, Pi Vanramchhuangi [Ruatfela nu] Pi Lalmalsawmi [Lalmali, AMC Councillor]. A pawimawh em mai tiin Pi Daduhi Khiangte kan sawm, grape chingtute hmangaiin a naute pawh kum hnih la tlinglo chu a lo feh chhuah pui dawr dawr bawk. Pu Lallianchhunga, Asst Professor MZU leh Pu David M. Thangliana te kan ni. JVM Mohan Rao wine specialist, kha tih hun laia Horti deptt-in consultant-a an hman nen phonah kan in be zeuh zeuh thin a. Hnahlan grape wine chhiatzia min hrilh ta mai, “In reng reng suh, wine a ni lo, vinegar a nih hi,” a ti ta. “A sen tho si a, engnge a that lohna?” ka ti a. ”Grape rawng hi chuti maiin a da thei lo, Plastic zem [sintex]-ah an um/bilh a, a tha lo em em phawt a, a hmasa a zawhin chini an bun lut leh teuh a, chu chu wine ni loin Vinegar tha tak, sachiah hnip nan a tha hle,” tiin min hrilh. Ka harh ta kuar mai. Hei vang chiah hi a lo nih hi grape an sawngbawlna en ka dil pawhin ‘luh a buaithlak inhnuaiah kun ket keta kalte a ngai a’ min lo tih thin. Khatih hun lai kha chuan NO 1, NO 2, 3 etc an lo nei thin. Tlangval pakhat chuan, “A tlangpuiin No. 1 chu kumtluanin kan in turin chhung tinin kan dah tha tha thin,” a ti ta dah mai. Ka thianpa pakhatin, “Mizoramah Phunchawng leh Hnahlanin chini an heh ber,” a tih kha a dik hmel khawpin ka hria. HEI HI 2004-2006 VEL KHA A NI A, TUNA ZAWLAIDI AN SIAM HMA A NI. Tunah chuan uluk tak leh thianghlim takin stainless steel-ah Zawlaidi an siam tawh a. Vawi 3 vel ka han kal ve tawh a. An grape hmun hla tak takte kea kalin video-in thla ka la. He leia Isua thil tih mak hmasa ber leh tihpun nasat ngaisang ve tak ka nih lai kha a ni a. Thlen zan vela tanpuina leh harsatna sawi khawm laia kan tam theih nen, haw dawn tuk chuan min vai liamtu an tam lo thei khawp mai. A tlangpui thuin um khat hi ka pai hawn ve ang che titu ai chuan litre engzat nge min dawr dawn tih a tam zawk. Tunah chuan CHAMPWINE LEH ZAWLAIDI TAN CHEERS, state atanga export tam tak nei thei se. Tunah chuan CSS zawng zawng 50:50 pattern-in Government of India-in kal tur an ti ta bur mai si a. Govt of Mizoramin department hnenah 90:10 lo chuan engmah tih loh turin order a chhuah leh niin ka lo hria a. Grape wine industry chauh ni loin mi tin fairelbel a khawih dawn a ni. Kan future chu bright lo tak a ni. Mizoram sawrkar chauh ni loin NE states ten tangrual nawr nasat a ngai hle dawn a ni. MNF, MPC, ZNP, BJP pawh lo sawrkar se tun anga GoI a kal tlat si chuan tih ngaihna a awm chuang dawn lo. Pu Rama, Pu Thangte te chuan sum an hai lut thiam tih a awm thei tawh lo. Thawhchhuah nei lo chuan state matching share pek tur awm miau dawn heklo le. Hetianga BJP sawrkar a kal si chuan Manipur-a tribal-te tangrual ang khian, ALL PARTY MEETING NEIHNA CHHAN THAM A NI. NGO pawh inhmukhawmin all party te nen core group siama 90:10-a kan let leh theihna tih tak zeta zawn a tul. Tunah hian chhung tin fairel bel khawih hi problem a ni a, solve tur a ni. A harsa ngawt ang, kan thei lo ang tih rilru pu saa kan awm chuan kan hneh lo vang. Kawngin zawh khum leh courta tang tura in beih a hunlo.Zawlbuka etang theuh theuh kha zawlbuk a chhiat dawn chuan tangruala zawlbuk kha thawm a ngai a ni. Hei hi politics diktak zawk chu a ni e. PRISM pawh hian mi sualna chauh dap ngawr ngawr lovin an capicity ang tawk an tan ve a ngai, vairama an connection media etc hmang tangkaiin. Hetiang a nih zel chuan mi thil tihsual chan tur an nei tawh lo vang tih ka hlauhpui. Mipui pawhin ei rute hi hre ringawt lovin kan mi zinga awm nuam lo khawpa kan siam a hun tawh. Electric deptt-a thawk, a bikin line man etc te pawhin an deptt a nih vang maiin heater hi metre box kal tlang lovin chhi lo ve se. Tlem theuh kan eiruk hian hlawm lianpuiah a chang thin. Transformer puak kan tih fo pawh hi a over load chu thuhran, hmanlai atrang tawhin transformer hlui kan hman duh tawh loh vai leitira major repair-a thar anga lei a tam hle an ti thin a tak tak emaw? Chutiang zelin sawrkar da thei lova kan ngaih thin hi sim a tul takzet a ni. Hnathawk leh lo neitute etc te tanpui chu sum awm loh vangin MR pawh an ban chur chur mek. Department tam zawkah chuan computer operator, MR CSS atranga hlawh siam sak thinte an ban a, LDC, UDC-in data operate chu sawi loh, games khelh nan bak computer an thiam si lo a, an lak leh a ngai fo. Rail station-a thingpui sem thin PM a nih theih chuan 50:50 pattern hi chu kan politician te tan challenge a ni. ‘Sorkar laipuiin an ti tlat sia, a ngaihna a awm lo,’ tiin mipuite min hrilh turah ka ngai lo. 90:10-a min luhpui thei lo a nih chuan 50:50 hian tha taka enkawl dan kawng an zawng chhuak tur a ni. Kan hruaituten politics dik tak an thiam leh thiam loh a lang ang. Ka thianpa Assamese hnenah tuna kan ministry chu eiruknaah an fihlim hle asin tiin uang angreng deuhin ka hrilh a. Ani chuan, ‘Kudam me khana nai hoga to chuha bi nai hoga’ tiin mi chang a. Ka ngaihtuah ta vang vang a, kan ram hruaitute hi “AN CORRUPT LO TAK TAK NGE EIRUK TUR PAWH AN SAWI CHHUAK THIAM LO ZAWK” tiin.