Aizawl June 21, 2023: Vawiin khan Chief Secretary Dr. Renu Sharma, IAS, kaihhruaina in Chief Secretary Conference hall-ah Mizoram Employees’ State Insurance Society (MESIS) meeting neih a ni a, Mizoram-a ESI Scheme kalpui dan te an thlirho. Employees' State Insurance Scheme (ESI Scheme) hi thla khata cheng 21,000 hlawh tling lo ten hamthatna an dawn theihna a ni.

ESI Scheme hi private hnuaia thawkte hamthatna atan India Sawrkarin kum 1948 khan a din a, he scheme hnuaia inziak lutte leh an chhungten damlohna, naupai leh nau neih chungchangah te, hnathawhna avanga ramtuileilohna leh thihna hial tawh thlenga hamthatna an dawn theihna atana duan a ni. 

He Scheme hnuaiah hian sumdawnna hmun eng pawh – hotel, thingpui dawr, cinema hall, chanchinbu chhutna hmun, dawr, zirna in, damdawiin leh a dang te, mi 10 aia tlem lo hnathawktu awmna te an in register vek tur a ni. Heng hmuna thawk, thla khata cheng 21,000/- aia tam lo hlawhte chuan ESI Act hnuaiah hian hamthatna  an dawng thei a ni.

ESI Act 1948, Section 46 in a sawi angin ESI Scheme hnuaia hamthatna dawn theih te chu : 1) Medical Benefits 2) Sickness Benefits 3) Maternity Benefits 4) Disablement Benefits 5) Dependent Benefits 6) Funeral Expenses 7) Rajiv Gandhi Shramik Kalyan Yojona 8) Pension te tan Medical Care.

ESI Scheme hnuaia inziak lutte hian hnathawktu (Employee) in a hlawh atanga 0.75% leh a chhawrtu (Employer) in hnathawktu hlawh atanga 3.25% thla tin a chhun luh a ngai a. Hnathawktu, ni khata cheng 137/- hlawh tling lote chu hnathawktu hlawh atanga pek tur 0.75% hi chhun luh ve a ngai lo a ni.

Tun dinhmunah hian Mizoramah ESI Scheme hnuaiah hnathawk mi 4006 leh establishment/unit 324 an in ziaklut tawh a ni.