Aizawl August 27, 2024 : Vawiin atang khan Cheng nuai 8692.39 man tur Serchhip District Hospital thar sak hna chu tan a ni.

Serchhip District Hospital thar sakna atan hian Power Grid Corporation of India Limited (PGCIL) atangin Serchhip DC kalta pahnih Abishek Kumar, IAS leh Nazuk Kumar, IAS ten CSR Fund Rs. Vaibelchhe 21 an dilchhuahsak a, Serchhip Bialtu MLA leh Chief Minister ni bawk Lalduhoma’n Cheng nuai 6845.39 (Cheng Vaibelchhe 68 chuang) a ngaihtuah belh sak dawn bawk a ni.

Hospital satu tur Contractor atan hian Zamzo Engineering Construction & Consultancy Firm te thlan an ni a, anni hian kum 3 chhunga sak zawh an tum dawn a ni.

Vawiin chhun dar 12:00 Noon khan Hospital thar sak tur hi Pastor ZD Lalhmachhuana’n Pathian hnenah hlanin a tawngtai a, hna tan nghal a ni.

He hunah hian Zamzo Engineering Construction & Consultancy Firm Proprietor Rony Zolianngura chuan Serchhip in Hospital tha leh changtlung tak an nei tur chu a lawmpui thu sawiin Drawing ang thlapin, Zoram pum huap pawha Hospital chhuanawm tak ni tura sak an tum tih a sawi.

He hunah hian Hospital sak chungchang buaipui tura din Joint Action Committee Chairman Kapliana Pachuau pawhin thu sawiin, “Hospital hmunhma hi Pathianin Pastor Chhawna hnena inlarna kaltlanga min pek a nih avangin Serchhip mipui hian kan ngaihlu em em a, Power Grid Corporation of India Limited (PGCIL) in sum min pek Rs.Vbc 21 let thum aia tam Rs. Vbc 68 chuang min ngaihtuah belhsaktu kan Chief Minister Lalduhoma chungah lawmthu kan sawi a ni,” tiin, “Chief Minister ngenna leh duhdan angin JAC te hian he Hospital sak hna hi kan vil zui reng dawn a ni,” a ti bawk.

Serchhip JAC te ngenna angin Hospital hnuai hi Ramthlun kawng rualin Public Parking atan laih a ni dawn a, Parking hi chhawng thum awmin mipui tan chhawng hnih ruahman a ni a, Car 72 leh Two Wheeler 100 a leng ang. Parking chhawng chung ber chu Hospital thawktute leh Ambulance te, dam lo hruaitu lirthei te tan ruahman a ni bawk ang.