Aizawl May 26, 2023 : Commerce & Industry Minister Dr.R.Lalthangliana chuan vawiin khan Darzo Kai, Tuipui D Lei lian cheng nuai 9200 senga dawh a nih tur thu a puang a, lawmawm a tih thu leh Cheng nuai sing chuang sen pawh a la ni theih tur thu a sawi. 

South Tuipui bialtu MLA hian '29-South Tuipui A/C MNF South Block Political Leadership Training' S. Vanlaiphai Tourist Lodge-a hun a hmanpuinaah Lei dawh a nih tu hi puangin, He Lei dawh tur hi sut tlang harsa a tih thu leh nasa taka a nawr hnuah, a hlawhtling ta chu MNF sawrkar hnuaia hmasawnna ruhrel lian tak anih thu a sawi. "He lei dawh tur atan hian a bul vela mite tana compensation pek tur cheng nuai 700 zet pawisa pawh DC office-ah a awm tawh a ni. He mi thilah hian Delhi ka kal apiangin BRO hotute leh finance ministry lamte nasa takin ka nawr ziah a. China ral lo lian ta se, a tangkai dan tur ka sawi chu Central lam pawhin an ngaih pawimawh phah hle bawk. Thla leh emaw chuan Chief Minister Pu Zoramthanga emaw, Central Minister-in a lung an rawn phum ang tih ka puang nghal bawk a ni," a ti.

Commerce & Industry Minister chuan he lei tangkai dan tur sawiin, "Hei hi tu sawrkar kal tawh mahin an la tih theih ngai loh, Siaha/Lawngtlai District mipui Aizawl panna tur atan mellung pawimawh tak a ni dawn a. Tuna Kawlchaw Lei sei an dawh ai pawh hian a sei zawk ang a, tui a len lai ber pawha a chim phak ngailoh tura sangin kan dawh dawn a, Truck lian ke 14 nei pawh a insulpel zur zur thei dawn a ni. Tender pawh chhuah tawhin June thla hi chuan a thawktu tur Contractor hming kan hriat hman ka beisei," a ti bawk.

Dr. Thangtea chuan, "Pang khua atanga chhuk thla, Bualpui to Saisihchhuah kawnga lei lian dawh tur pawh central lam ka nawr nasa a. Hmasawnna ruhrel lian tak lei lian kan hlawhtling thei tur pawh hi a lawmawm ka ti hle bawk. He lei kan dawh tur hi Myanmar politics buai a reh hnuah insumdawn tawnna atan rotling tak a ni dawn bawk a ni," a ti bawk.