Tunhnaiah Health Department leh Social Welfare hotute chuan an hmalaknaah mipui puihna an mamawh thu an sawichhuak a. He thu hi chanchinbumite puangzar turin an ngen bawk a ni. Hetianga ngenna an siam hi thil tihawm tak a ni a, mipui hnena puanzar duh neite chuan media an belh a ngai fo thin. Department dangte pawhin an hnathawh a chak theihna turin mipui thlawpna an dil fo thin a, ramhnuk khawih policy angah phei chuan thil pawimawh tak pawh a ni awm e. Department hotute chang ni lo ramhruaitute pawhin mipui thlawpna ngenin thu tha tak tak an sawi thina mipui lamin an ngaithla liam fova, zawm loh chang a awm thin a ni. Policy ti hlawhtling tur phei chuan a changtu minister chauh ni lo, ram hruaitute’n an vei rawn a ngai a, tih tak takna a tel chuan mipui lamin an hmu thuaia an zawm mai thin a ni. Hetiang hrethiam tur chuan ramhruaitu lehkha thiam leh thil hre zau kan mamawh reng a ni. Sawrkar department hotute’n hma an laknaa mipui thlawpna an ngen thin hian rah tha thlen thei se a duhawm a, an department thawhna chu ‘a enkawltu mai’ niin mipui chu a neitu tak an nih thuin an fuih thin a. Hei hian sawrkar hnathawkte indah awlna lam a kawk lova, mipui lam chu a neitu dik tak an nih thu leh an chanpual ti tura inngenna lam a kawk zawk a ni. Mipui an awm loh chuan hnathawh sak tur an awm lo mai dawn tihna a ni. Mipui lamin sawrkar deparment te hi an ta a ni tih an hriat hma chuan hmasawnna a awm thei lova kan thanharh a hun ta hle! Sawrkar hnathawh hi mipui rawngbawlna a ni a, kan tiri fo a; sawrkar hnathawkte hian an chetziain thahnem an ngaihna tilang lehzual sela mipui hi an hneh thuai theih a beisei awm. Mizoramah hian mihring nuai 10 kan cheng a, mihring tlem ang huin sawrkar hnathawk an tam hle a, 60,000 dawn an awm a; chhiarkawpa chawhrual chuan in bitum tham lek kan awm a ni. Engpawh nise, media kaltlanga ramhruaitute leh department hotute’n duh zawng an sawi thin hi mipui benglakna remchang tak a nih rual hian an rilru hneh tur chuan chetzia a pawimawh tel ang.