A pasal Gerard Piqué nen an inthen hnuah Shakira chuan chanchin duhawm lo dang a nei zui a, chhiah awl ruah puh a ni. Colombian singer hi thiam loh a chang a nih chuan kum riat lugin tang tur leh €mtd 24 chawi tura hrem theih a ni ang.  

Spanish prosecutor te chuan Shakira hian kum 2012-2014 inkar khan chhiah a awl ru niin an sawi a, hetih hun chhunga a chhiah chawi tur hi €mtd 14.5 niin an sawi. Prosecutor te chuan kum 2012-2014 inkar khan Shakira hi Spain-ah a cheng tih an sawi a, an ram danah chuan thla ruk aia rei an cham chuan chhiah chawi a ngai. 

Hemi a nih avang hian Shakira pawh hi chhiah chawi tur a ni a, mahse a lo awl ru niin an sawi. Kum 45 mi Shakira ve thung chuan he tih hun lai hian Spain-ah ngawr ngawr a cheng lo tih a sawi a, hmun dang nen a kar tawn niin a sawi. A aiawhtu chuan Shakira hi an puhna chungchangah hian a fihlim thu leh, a mimal dikna rahbeh sak tumna a nih thu a lo sawi ve mek bawk.  

Hetih lai hian document atanga a lan dan chuan Shakira hian 2012 khan Barcelona-ah in a lei a, he hmunah hian a pasal Gerard Piqué leh an fate nen an khawsa a ni. Official te chuan a chhiah pek dan an hriat duh avangin tax bill an dil a, Spain-a a awm lai bakah tun hnaia a tax pek dan thlengin an chhui nia tarlan a ni. Kum 2015 khan amah Shakira hian tax a pekna hmun tur chu Spain a nih tur thu a lo puang tawh a nih kha.

A pasal hlui Gerard Piqué pawh hi 2019 khan Spanish national court chuan chhiah chungchangah €mtd 2.1 a lo chawi tir tawh bawk a ni. Shakia (45) leh Piqué (35) te hi kumin June thla khan an inthen a, kum 11 lai chengdun hmanin fa pahnih an nei a ni. 
Shakira hi a chungchang ngaihtuah hun tur tarlan a la ni lo a, thiam loh a chang a nih chuan kum riat chhung lungin tan leh  pawisa thanhnem tak chawi thei dinhmun a ding a ni.