ZALEN, September 05, 2025: Mizo rimawi khawvela pa lian ber ni mek zinga mi, H.O.M leh Model Zuali Chhangte channa movie, Hretu Der chu Inrinni zan dar 08:00 hian Vana Pa Hall-ah tihchhuah a ni dawn.

Chhungkua pawha en him tura duan, Hretu Der hi chhungkaw pahnihaa inhmelmakna leh inhuatna thleng avanga tualthahna chhuina thawnthu a ni.

DNChL hla avanga Zoram khawvel hriat hriat hlawh, H.O.M leh Zuali Chhangte bakah hian Darchhingpuii filma mi sual chang thiam tak, Duhawma te; Bawrdar Kartel leh Single Since 1995-a a chanpual hnehsawh zet, Hmai Varte pawh a inlan dawn.

Opix Renthlei direct Hretu Der hi Project Unlimited kut chhuak a ni a. Mizo movie-a sulhnu tam tak lo nei tawh, Nicholas Remruatpuia chu director of photography a ni bawk.

Runmawi produce niin tlangzarh zan atang hian Runmawi app-ah lei theiha chhawp chhuah nghal a ni dawn a. Vana Pa Hall-a tlangzarhnaah hian a hmunah ticket lei theih a ni ang a, online-a hauh theihna kalpui mek bawk niin ticket leite tan vanneihna siam a ni bawk.