Chi inthliarna hawi zawnga Hungary fans te chetna FIFA-in chhui dawn

Admin - Sep 05, 2021

Fifa disciplinary lamin an chhui chiang dawn

Ningani zana Hungary leh England ten World Cup qualifier an khelh tuma, chi inthlirna hawi zawnga England player thenkhat laka Hungary fans te chet dan chu Fifa disciplinary lamin an chhui chiang dawn.

Hungary fans te hian mual chhunga England player te hmaah flare leh thil dang an vawm lut a, Budapest hmuna thil thleng ang hi Fifa lam chuan an la thutak hle a, he chi inthlirana hawi zawnga hmalakna hi disciplinary committee lam chuan an chhui chiang dawn ta a ni. He inkhelhah hian England hian Hungary hi 4-0 ngawtin an sawp.

Hemi tum hian Hungary fans lam hian Raheem Sterling leh Jude Bellingham te chu an tum deuh bik a, Puskas Arena-ah hian second half-ah England player te chu hmanrua leh flare hmanga vawm an ni a, he thil thleng hi England lam chuan demin, “Thil thleng pawm theih loh hulhual a ni,” an ti. 

"He thil thleng duhawm loh tak chungchang hi Fifa hnenah FA lamin hrem turin an hrilh hre ngei tur a ni ang. Hetiang thil thleng duhawm lo hi football atangin kan paih bo ngei tur a ni,” tiin British Prime Minister Boris Johnson chuan a sawi. “Kan player te laka Hungary fans chet dan kha ngaihzam theih a ni lo,” a ti bawk. Fifa a inrawlh ngei ka beisei a, zilhhauna na tak an kalpui ngei ka beisei. Football game a lo thianghlim-a a that zawk theihna turin kha tiang thil thalo kha kan paih bo a ngai a ni,” a ti bawk. 

Fifa lam pawh tawng chhuakin match report te chiang zawka en nawnin disciplinary committee ten hma an lak tur thu a sawi. “Fifa hian dinna nghet tak a nei a, chu chu chi inthliarna leh tharum thawha inbeihna hi a duh lo hulhual a ni,” a ti. Uefa lam pawhin Hungary ten home game thum an la khelh tur chu entu awm lova khelh tir an duh thu an sawi ve bawk. Europe-a World cup qualify khelh hi Uefa kaihruaina hnuai nimahse Fifa chuan action a la thei tho a ni. Euro 2020-final khelh zan khan England fans ten buaina an siam chiam bawk a nih kha. 

Hemi chungchang hi sawi chhuakin Hungary Foreign Minister, Peter Sziijarto chuan, “Euro 2020 Final khelh dawna England fans ten Italy player te national anthem sak lai an lo au buai lai video chu Facebook-ah a post a, "An rama thil thleng ang kha England player ten an complaint bik nia  mawle" a tiin a ziak zui. Wales captain Gareth Bale chuan, “Fans ten chi inthliarna hawi zawnga chet an lak chuan team pum hi khel thei lova hrem mai nise a tha berin ka reng,” a ti.

Share now