Aizawl May 18, 2023: ZPM Working President K. Sapdanga chuan Chief Minister atana leh Leader atana Lalduhoma pawm lo tan ZPM-a awm a remchang lo tih a sawi a, Mizoramah ZPM thli a tleh mek niin a sawi bawk. 

ZPM Aizawl North - II Block Extended Meeting a hmanpuinaah ZPM Working President K. Sapdanga chuan, “Tunlai hian MNF leh Congress hian Pu Duha nena inngeih loh tir min tum thar leh nasa hle a, eng ang takin nge he thil hi an kalpui lehzel ang tih pawh kan hre lo. Kan lungrualna tichhe tur zawnga min beihna hi ZPM chuan kan nghin phah tur a ni lova, Leader atana Pu Duha pawm lo leh Chief Minister atana Pu Duha pawm lo tan ZPM- a awm hi a remchang lo a ni,” a ti. 

K. Sapdanga chuan “Vawiinah chiang taka ka sawi duh chu ZPM hi ka chhuahsan a nih ngawt loh chuan Pu Duha Leadership hi lungsi takin ka pawm a, Val Upa Council rorelnaah hian ka lungawi a ni,” a ti bawk.

ZPM Working President chuan, “Mizoramah thli a tleh mek a, chu thli chu ZPM thli a ni. Khawi atanga lo tleh tan nge pawh kan hre lova, thingtlang, khawpui leh sawrkar hnathawk zingah pawh a tleh mek a ni. Hei hi a chhan nia lang chu sawrkar tha, kalphung thar mipui sawrkar duhna a lian hle tihna a ni. Nu ho zingah a tleh a, thlalai zingah na takin a tleh mek zel tih chiang takin a lang a ni. Thli neitu hi politics neitu a nih tlat avangin a duhzawngin i campaign zel ang u,” a ti. 

Sapa chuan, "Opposition ni chungin Lunglei Municipal Council-ah seat awm zawng zawng lain kan solid-a, Zemabawk Local Council thlannaah kan solid leh bawk. He kan hlawhtlinnaah hian kan party hi kan uang lova, engmah chhuan tur kan nei lo a ni tih kan hria; min thawhsaktu lam kan hawia lawmthu kan sawi ringawt mai a ni. Kan hmaa MLA thlan lo awm turah pawh hian hian, tlawm tak, lungrual tak leh thawhrimna nen kan thawh a ngai a ni,” a ti bawk.