ZALEN September 5, 2026 : Mizoram Sawrkar buatsaihin vawiin khan “Learning from the Past for a Resilient Future” tih thupui hmangin Aijal Club-ah Mizoram Chief Secretary lo ni tawh te nen inkawmhona hun pawimawh neih a ni a. He hunah hian Chief Minister Lalduhoma chu khuallian a ni.

Mizoram Chief Secretary lo ni tawh mi pali (4) — M. Lalmanzuala, Vanhela Pachuau, Lalnunmawia Chuaungo leh Dr Renu Sharma te he hunah hian an tel a. Mizoram Chief Secretary Khilli Ram Meena hoa buatsaih he programme pawimawhah hian anmahni chawimawina hun hman a ni a. Chief Secretary damlai zingah he hun hmang tura tel thei lo mi panga - Lalkhama, F Pahnuna, Lalfak Zuala, Haukhum Hauzel leh L.Tochhong te thuchah (message) chu Mizoram Chief Secretary hian a chhiarchhuak bawk a ni.

Chief Minister chuan Chief Secretary lo ni tawh ten Mizoram hmasawnna tura an ngaihtuahna, an tha leh zung nasa taka an lo sen tawh avanga chawimawina chauh ni loin, he hun hi an tawnhriat atanga finna an lo chharchhuah tawh te hmanga tuna thawk mek officer te fuihna leh finchhuahna hun a ni, a ti a. Heng kan Chief Secretary te hian an hunlaiin hun khirh tak tak an lo paltlang tawh a; khang hunlaia thilthleng te leh tunlai chu danglam tawh mahse, sawrkar hnathawkte hnathawh chhan “mipui rawngbawl hna” erawh a la danglam chuang lo a ni, a ti.

Lalduhoma chuan finna, rinawmna, mahni inthununtheihna leh taimakna te chu ram leh mipui hmasawnna atana thawktu sawrkar hnathawkte min kaihruaitu tur a ni, a ti a. Inrelbawlna tha leh sawrkar tha nei tur chuan remruat thiamna leh taimakna piah lamah ram hmangaihna leh inpumpekna nena mipui rawngbawl a tul a ni, a ti. Hmasawn zel turin kawng thui tak zawh tur a la awm, tiin Chief Minister chuan ziak leh chhiar thiamna kawngah India ram hmahruaitu nihna te, khawtlang leh mipui inpumkhatna leh thawhhona tha neih te hian kawng hrang hranga hmasawnna tur hmabak la neih te hlenchhuak turin nasa takin min tanpui dawn a ni, a ti bawk.

Mizoram sawrkarin hmalakna neih mek - Handholding Scheme, Project Monitoring Committee, Resource Mobilisation Committee, E-Office, grievance redressal leh digital land administration kalpui mek te leh kalpui dan te he hunah hian Chief Minister Lalduhoma chuan a sawi a. Ram hmasawnna leh mipui khawsak dinhmun chawikang tura hna an thawhna kawngah theihtawp chhuah turin kalkhawm te a fuih a ni. 

Chief Secretary Khilli Ram Meena chuan Chief Secretary lo ni tawh te hnenah lawmthu sawiin ram rawngbawl hna an lo thawh tawh te, chona an lo hmachhawn tawh te leh tawnhriat ngaihnawm tak tak an lo neih tawh te hmanga tuna thawk mek officer naupang zawkten ngaihtuahna leh phurna thar nen hna an thawh theihna turin programme hi ruahman a nih thu a sawi a. He workshop hi an hman tangkai ngei a beisei thu leh, a tel zawng zawng ten rilru inhawng tak leh uluk taka ngaithlaa, Mizoram hmasawnna tura hlawkna chharchhuah tum ngei turin a chah a ni.

Programme hi session hniha then niin hun hnihna ah hian Pu M. Lalmanzuala, Vanhela Pachuau, Lalnunmawia Chuaungo leh Dr Renu Sharma te chuan Chief Secretary an nih laia an thil tawn te leh officer te fuihna thu an sawi a. Kalkhawmte nen sawihona leh zawhna leh chhanna hun an hmang a ni.

Session hnihnaah hian Home Secretary Vanlalmawia leh Planning Secretary David Lalthantluanga ten Mizoram hmalakna bakah State leh District a sawrkar inrelbawlna kalpui dan te an sawi.