ZALEN November 19, 2025: Chief Minister Lalduhoma chuan vawiin khan Secretariat Conference Hall-ah Cabinet Minister K. Sapdanga chan department pahnih, Home Department leh UD&PA Review meeting a neihpui a, hnathawk tlak lo te special pension pek mai chu sawrkar duhdan a nih thu a sawi.

Lalduhoma chuan, "Review Meeting hi in dik lohna zawnna meeting a ni lo va, kalphung leh tihdan tha zawk kan neih theih nan te, hmasawnna hna chak zawka kan thawh theih nan tea inrawnkhawmna a ni. In ngaihdante tlang takin sawi ula, inpawh takin meeting nei ang u," a ti a. 

Service Review Committee nei rang tura chahin hnathawk tlak lote chu Special Pension Scheme hmanga pension peka, hnathawk thei ngeite lak mai chu sawrkar duh dan a ni, a ti. Office hunbi lo ngaipawimawh tur leh officer te chu an hnuaia thawkte welfare lo ngaipawimawh reng turin a chah a ni.

K. Sapdanga pawhin Chief Minister hmalaknaah lawmthu a sawi a. Review Committee hian thawktute a tiphurin thawhhona pawh a titha a ni, a ti.

Home Department dinhmun leh hmalakna hrang hrangte chawhma lamah sawiho a ni a. Chawhnu lamah UD & PA hmalaknate sawiho a ni. Department pahniha thawktute hian an hnathawhte leh hma an sawn zelna atana an ngaihpawimawh thilte a hnena sawina hun tha an neih avangin Chief Minister hnenah hian lawmthu an sawi a ni.

Home Department review meeting-a sawiho langsar zualte:

1. Mizoramah Central Force, Assam Rifles, Border Security Force, Central Reserve Police Force, Border Roads Organisation, Army Medical Corps, Army Recruiting Office leh CIJW School ten hna an thawk mek.

2. Indo - Myanmar ramri sei zawng hi km 510 angin Home Ministry chuan a chhinchhiah a. A dungah Mizoram Police Station 12 a awm mek a, Assam Rifles ten duty post eng emaw zat an nei bawk.

3. Free Movement Regime hnuaiah Border Pass pek thin a ni a. October ni 30, 2025 thleng khan Border Pass hi 21,238 pek tawh a ni. Pass hi hmun pathum Zokhawthar, Hnahlan leh Zochachhuahah te pek chhuah a ni.

4. Indo Myanmar ramri venhimna tha tak avangin Ruihhlo leh dan lova Kuva lakluh a tla hniam nasa hle.

5. Border Haat din hna kalpui tan a ni dawn a, Ministry of Home Affairs duh danin Zote, Champhai District-ah pilot project kalpui phawt a ni ang.

6. Mizoram leh Bangladesh ramri thui zawng hi km 318 angin MHA chuan a chhinchhiah a. Mizoram Police Station 6 awmin BSF duty post eng emaw zat a awm.

7. Manipur leh Mizoram inrinaah Police Outpost 8 a awm mek a, Assam nena ramriah outpost 22 a awm a, ramri buai chungchanga official level meeting neih leh hun tur duan mek a ni. Assam leh Mizoram inrina, buaina chhuah thinna hmunah hian CIJW school chuan an training hmunhma zauh an dil a. State pahnih Chief Minister te pawhin an sawi dun tawh a, Assam lamin tihtur an neihte ngaihchan mek a ni. Tripura state nena ramriah Police Outpost 6 a awm mek.

8. ILP online portal tha zawk buatsaih mek a ni.

9. Kumin July atang khan Myanmar leh Bangladesh atanga lo lutte Biometric enrolment (Foreigner Identification Portal) kalpui tan a ni a. Myanmar atanga rawn lut hi zaa 58.15 ziahluh (enrol) tawh an ni a, Bangladesh atanga rawn lut zaa 10. 84 ziahluh tawh a ni.

Tunah hian Myanmar atanga rawn tlan mi 31214, Bangladesh atanga rawn lut mi 2354 leh Manipur state atanga lo lut displaced mi 6953 chhinchhiah mek a ni a, a danglam ve reng thin.

10. Mizoram State Human Right Commission din hi Council of Ministers chuan October 2024 khan a lo phal tawh a, Commission dinna Notification leh Post 16 siamna Notification pawh tihchhuah tawh a ni. Reiloteah a taka kalpui a ni ang.

11. SASCI atangin Central Jail, Central Women Jail, District Jail - Lunglei, Siaha, Champhai, Kolasib, Serchhip, Mamit leh Saitual te sak an ni a. Saitual hi hawn theih a ni hnai a. Mizorama Jail tangte ei leh in (prisoner's dietary items) atan hian thlatin Rs. 40 lakh vel sen ral a ni.

Heng bakah hian Home Department hmalakna leh hmasawnna tur thil dang tam tak sawiho a ni.

Urban Development & Poverty Alleviation review meeting-a sawiho langsar zualte:

1. Aizawl Sustainable Urban Transport Project hmangin Aizawl leh a chhehvel inkalpawhna kawngpuite nasa taka tihhmasawn tum mek a ni.

2. Aizawl Traffic Management tha avangin 18th Urban Mobility Indiaah UD & PA hian Special Award a dawng.

3. Parking Facility hi MINECO ah tha takin zawh tawh a ni a, Zodinah a zo tep tawh a, McDonald Hill leh Venghnuaiah thawh mek a ni.

4. Public Space & Facility ah Aizawl Lungdawh zawh tawh a ni a, Aizawl Sumtual leh Aizawl Dawh-Rem pawh zawh tep tawh a ni. Aizawl City Centre, dawr 1102 awmna, Cold Storage nena thuam chu Bazarah sak mek a ni.

5. AR chhuahsan rama sawrkar hmalakna tinrengah Nodal Department atan UD & PA chu thlan an ni a. Advisory Committee chuan site development kalpui dan tur hi a pawm fel tawh a ni.

6. Thenzawl Peace City Master Plan, Neihloh khaw thar Master Plan, Khawzawl Master Plan leh Saitual Master Plan te siam mek a ni.

7. UD & PA hian khawpui hrang hrangah Urban Development leh Solid Waste Management lam hmalakna a kalpui nasa hle a. Heng an hmalaknate hi chipchiar takin presentation an pe a, a tul anga sawiho nghal zel a ni.

8. UD & PA hian Reform based Incentives hi SASCI 2023-24 ah Rs. 157 crore leh SASCI 2024-25 ah Rs. 495.50 crore an hmu a. SASCI 2025 - 26 ah hian target Rs. 778.50 crore an nei leh mek a ni.

9. Storm Drain hi SASCI atangin district khawpui hrang hrang tan tam tham tak kalpui mek a ni a, Aizawl bikah hmun 26 ah siam a ni ang.

Heng bakah hian AMRUT hmalakna te, department-in hna an thawh dangte chipchiar takin an sawiho a ni.