Aizawl December 12, 2023 : Vawiin khan Chief Minister Lalduhoma leh a nupui Liansailovi te chuan Mizoram Chief Minister hmasa ber Ch. Chhunga nupui Rothangi chu a chenna in, Saron vengah an tlawh.

Lalduhoma te nupa hian duhsakna chibai bukin pangpar an hlan a. Rothangi pawhin sawrkar tluang tak a kaihhruai theih nan duhsakna hlanin a lawmpui thu a lo hrilh a, Bungalow-a an luh hunah la tlawh ve ngei a tum thu a sawi a ni.

Union Territory sawrkara Ch. Chhunga kum 1972-a Chief Minister a nih khan Lalduhoma hi a Private Secretary ni turin a ruat a, chuta tang chuan vawiin thlengin inpawh takin an awm zui ta a ni.

Rothangi hi tunah kum 99 mi a ni mek a, a taksa hriselna pawh a la tha viau niin a insawi. Ch. Chhunga nen hian kum 1948 ah an inneia, fa sawm leh pakhat neiin tunah hian an fate pariat an la dam a ni. Tu 41 leh tuchhuan 58 a nei mek.

Rothangi hi a naupang lai pawhin a fel hle a, St. Mary's School, Shillong-a High School a zir lai pawhin zirlai naupang sang chuang zingah naupang fel berah thlan a lo ni tawh a ni. Chief Minister in a tlawh lai hian a tu leh faten an tawiawm a ni.