Aizawl July 1, 2024 : Remna Ni June 30 kha Pathianni anih avangin Vawiin khan Congress party chuan Congress Bhawan-ah ‘Remna ni champha vawi 38-na lawman programe’ an hmang a, he huna thusawitu Former Legislators Association of Mizoram President Liansuama chuan MZP-in Remna Ni an lawmna a Chief Minister Lalduhoma'n Remna siam a nih laia Chief Minister Lal Thanhawla hming a lam miah lo chu mak a tih thu a sawi.

Liansuama chuan, “Remna atan kan hotute khan an thawkrim hle a, tuboh leh dolung inkara awm ang an ni a, thing leh raw innawh laiin, ring rawlh tak meuh in hma an lo la thin a ni. Central lama kan hotuten Pu Hawla’n CM nihna a kian dawn a tih khan mak an ti a, inremna atana lalthutthleng ken hi inpekna vawrtawp atang lo chuan a theih loh a ni. Kan hotute kha anmahni an inhlan a, mellung pawimawh tak an phun a ni," a ti.

“Remna hi Kohhran te leh mizo mipuite tawngtaina rah a ni a. Remna a lo thlen theih nan kohhran, YMA leh MZP te hian hma an la vek. Khatih hunlai khan Chief Minister Pu Lal Thanhawla, kei, Pu Rokamlova leh Pu Hipheia te khan Minister nihna kan kian a ni. Kha kha inremna atana thil pawimawh, sawi hmaih theihloh a ni a. Remna chungchang sawi chuan Pu Lal Thanhawla hming lam thei loh theih a ni lo. Hmanni a Remna Ni hmanna ah khan kan Chief Ministerin khatih laia Chief Minister Pu Lal Thanhawla hming a lam ri lo kha a mak hle a ni," a ti.

“Kum 1963 ah MNF a lo piang a, zalenna an sual avangin kum 1966 ah namen lovin kan ram a lo buai ta a ni. Khang hun lai khan Assam District pakhat chauh kan ni a, tunlai a hmasawnna kan sawi hi chu vana rah ang a ni. Mizo mipuite India sipaiin min sawikhawm a, MNF lamin silai an lek bawk a, kan rethei ngawih ngawih a. Chutianga buaina namen lo a thlenna chhan chu Politics buaina a ni a, chu buaina chu chingfel a, Mizoram-ah remna leh muanna a lo awm theih na turin Congress Party chu kum 1968 ah din a lo ni ta a ni," tiin Congress indin chhoh dan a sawi bawk.