China-a canteen puak leh chimah mi 16 thi

Admin - Jan 09, 2022

China-ah hian in leh industry-a hetiang chhiatna thleng hi a tam hle a. Hei a sak dan dik tawk lo leh himna lam ngaihthah te, a hlui tawh vangte a ni. Thawhtanni pawh khan chhimthlang lam, Guizhou province-a in sakna hmuna lei minah mi 14 vel an thi. December khan Chongqing-a thil lauh chhuahna chimah thawktu tangin mi 18 vel an thi a, hei hi thla khat chhunga hetiang a thlen vawi hnihna a ni.

China chhimthlang lam, Chongqing khawpuia canteen-a luah inah gas ni ngeia rin a puah hnua chimah mi 16 vel an thi niin sorkar thupuangna, CCTV chuan Zirtawpni khan a sawi.

An ram sanaa Zirtawpni zanlai (India-a zan dar 9:30) vela thleng kha niin mi 26 lak chhuah an ni tawh a, mi 16 erawh an thi niin Inrinni khan a sawi.

Hliam tuar zinga mi pakhat chu a na hle a, mi dangte pawh in chim kar atanga lak chhuah an nih hnuah damdawi inah an la awm hlawm.

Chongqing-a Wulong district-a chhiatna thlenna hmunah hian mi 600 chuang chhanchhuah hna thawkin an awm mek tih Ministry of Emergency Management chuan a sawi.

Xinhua news agency-in thlalak a thehdarhah chuan khawl lian tak takin concret slab a tikeh leh a hnuk sawn laite pawh a lang.

Thlalak dangah pawh chhanchhuaktute leh sipai thuam inbelten in chim hnawk haia hliam tuar an la chhuak laite pawh a lang bawk.

Xinhua-in Globalink-a an tar lan dan chuan thil puah hun hi chhun chaw an fak lai a ni a. A puah chhan hi chhui zui mek a ni tih a tar lang bawk.

Share now