China chuan Himalaya tlangdunga ram buai tak, Kashmir-a India-in G20 tourism meeting a thlen turah tel a tum lo tih a sawi chiang.

China leh Pakistan ramte chuan India-in Muslim tamna, New Delhi leh Islamabad-in an rama an chhal ve ve, Kashmir-a intawhkhawm a nghat hi an dem hle.

Ram pahnihte hian Kashmir ram hi tlem ve ve an thunun a. Kum 1947-a Britain thuhnuai atanga an indan ve ve hnuah Kashmir chungchang avang hian vawi thum lai an indo tawh.

India hi kuminah G20 chairman a ni mek a, a ram chhung hmun hrang hrangah thutkhawm eng emaw zat a nghat kual a, summit pui ber chu September hian New Delhi-ah a thleng dawn bawk.

“China chuan ram inchuhna laia G20 meeting nghah hrim hrim hi a duh lo va, hetiang meeting-ah hian a tel lo vang,” tiin Chinese foreign affairs ministry thupuangtu, Wang Wenbin chuan Zirtawpni khan a sawi.

Kashmir chungchangah hian India-Pakistan kar hi kum 2019-a New Delhi-in Jammu & Kashmir state dinhmun tidanglama a enkawl bikna a hlih hnu leh sorkar laipui enkawlna hnuaia a dah hnuah a inmil lo zual hle.

India hian state nia inrelbawlna hran nei thin chu sorkar laipui hnuaia awm turin hmun hnih, Jammu & Kashmir leh Ladakh-ah a then a. Ladakh lama hmun zau tak hi Chinese thununna hnuaia awm a ni.

India thuhnuaia awm Kashmir pawh hi mahnia kea din emaw, Pakistan hnuaia awm zawk emaw duhtuten helna hmangin Delhi lakah an nawr a. Kum tam tak buaina chhuak tawhah civil, sipai leh Kashmiri hel sang tel an thih phah tawh.

New Delhi leh Beijing inkar pawh hi kum 2020-a Ladakh-a an sipaite intibuaia sipai 24 zet an thih atang khan a tha hleithei lo.

Tun tum thutkhawm hi Jammu & Kashmir-in nipui khawpuia atana a hman, Srinagar-in May 22 leh 24 inkarah a thleng ang.

VENHIMNA TIKHAUH

Ni thum awh tur thutkhawm hi Dal Lake kama venhimna khauh tak hnuaiah neih a ni dawn a. Police chuan ‘G20 thutkhawm chhunga mi firfiakten chetna remchang an hmuh loh nan hmun him lo deuh zawng zawngah venhimna a khauh thei ang bera kalpui’ a nih thu an sawi.

Zirtawpni khan India-a commando tha berte chuan Srinagar khawlaiah patrol an nei a. Intawhkhawmna neihna tur panna kawngte chu siam that vek niin electric ban pawh India flag rawng hmanga tihen a ni.

India hian Kashmir-ah boruak pangngai awmtir tur leh mi hmuhah pawh nihtir tumin a bei a, nikum khan state dang zawng tourism a promote nasa.

Prime Minister Narendra Modi chuan nuclear ralthuam nei ram pathumte inkar hi inzah tawnna, ngaimawh zawng leh duh zawng inhre thiam tawn taka chin fel theih a nih thu a sawi a. Hei hi New Delhi-in Beijing nena an inkara a ngaihdan a sawi chhuah khât tak a ni.