ZALEN, September 15, 2025: Thla hmasaa an tihchhuah, ‘Project Chawlhna Krista’ Episode 1 en tawhten nghakhlel taka an thlir, Episode 2 chu peih a ni leh ta a, Thawhtanni zan hian a chhuak dawn.

Episode 2-ah hian tun laia thalaite zinga Pathian fakna hla phuaha hriat hlawh ber zinga mi, Chris MS Dawngkima hla 11 a awm leh dawn a, a hmasaah pawh khan 11 tho a awm a ni.

Zoramchhani, Stacy leh Israela Pachau te pathumin ‘Fakna a thang mawi’ an sak tih loh hi chu Episode 2-a hla dah khawmte hi Chris-a hla hriat hlawh tak tak sa deuh vek an ni.

Zaipawl hla, ‘Ngai rawh i ka-ah’ tih leh ‘Fak rawh u’ tih chu Ramhlun North Pastor Bial Zaipawl leh Peace Choir ten an sa a, heng zaipawl hlate hi hei hi a buatsaihtute chuan project tihlu zualtu ni hialin an sawi.

KTP huanga hla hriat hlawh pahnih, general conference theme song pahnih, ‘A chhelai siam thatu’ leh ‘Tho la eng rawh’ tih chu sak zawm/sak pawlh (medley)-in Israela Pachuau-in hnehsawh takin a sa bawk.

KTP General Conference Hla Bua lo chuang tawh, ‘Nang muhil meng la harh rawh’ tih te bakah Mizo Idol leh Youth Icon intihsiakna leh hun dangah pawh mal zaia sak hnem pawl tak, Mizoram Synod Choir pawhin an lo sak thin, ‘Nang i thianghlim si’ tih pawh Melody leh Zorinsanga ten an sak dun chu ngaihthlak tur a awm bawk.

Kum 2004 vela hla lar, ‘Hei hi ka ngen a che’ tih chu a phuahtu, Chris-a leh a nau, Steward te music arrangement tharin an sa bawk.

A project hming tumtu ber, ‘Chawlhna Krista’ tih hi Praise On atanga hming chher, Cindy Lalthanpuii’n a sa a. Pathian fakna hla huanga thalaite ngaihven tak, Samuel Lalmuanchhana’n ‘Lalpa chu a thianghlim e’ tih hla a sa a. Testimony hla, ‘Hmangaih thuril ber’ tih chu Zorinsanga’n a sak bakah Arini leh Isaac Hnamte te duet ngaihthlak tur a awm bawk.

Project Chawlhna Krista-a zai leh rimawi tum hi live recording vek a ni a, hei vang hian a ri hi uluk lehzuala khawih a ni a, belhchian dawl taka chhuahtu hi EFX Audio a ni.

Episode 2 hi Thawhtanni zan dar 08:00-ah LPS 1 leh Zonet Zawlbukah tih chhuah a ni dawn a. Hemi hnuah hian ‘CHRIS MS DAWNGKIMA’ tih YouTube channel-ah chhawp chhuah zui a ni ang.