Aizawl September 8, 2023 : Vawiin khan Congress Party chuan kartina an tih thin danin Congress Bhawan Golden Hall-ah Friday Political Session an nei a, he hunah hian MPCC Vice President atana an ruat thar Lalnunmawia Chuaungo, IAS (Rtd) chuan BJP sawrkar hnuaiah hnam tlem zawk te an him lo a, Congress an sawrkar a ngai tih a sawi.

MPCC Vice President Lalnunmawia Chuaungo chuan rambuai avanga harsatna tawh hnuah Mizoram hian thil hlauhawm a hmachhawn leh mek nia sawiin, "Hnam tlem zawk leh Sakhaw tlem zawkte che thei lo va min siam hi BJP thil tum ber a ni a. Manipur-ah hleihnei takin ro an rel a. A tuartute chu kan unaute an ni. Central sorkarin a tih tur a ti duh miah lo va. Sakhaw zalenna pawh tih chhiatin a awm mek a. Hnam hnufual zawk leh tlem zawkte dinhmun hi BJP sawrkar hnuaiah a him lo a ni," a ti.

Assam Rifles te thuneihn sawiin Lalnunmawia chuan, "Kum 2019 February ni 19 khan Assam Rifles te hi kan Police te thuneih ang hi Home Ministry khuan a lo pe ve thlap. Law & order hi State sawrkar thuneihna a ni chungin Assam Rifles te eng nge an pek ve ngawt. Kei ngei pawhin an order chhuah tawh chu withdraw turin Home Ministry lehkha ka ziak a, engah mah an ngai lo. Mizo mipuiten kan huat leh kan duh loh em em hi Assam Rifles te hian rawn ti ta se tih theih kan nei dawn lo," a ti. 

Lalnunmawia Chuaungo chuan, "Central-a BJP te chakna ti tawp turin kumin a State 5 inthlan hi a pawimawh dawn a. Chung zingah chuan Mizoram General Election pawh a tel. North East-ah BJP leh a thawhpuiten sawrkarna an chang vek. India rama Congress a thawhkan leh theihna tur atan Mizorama Congress an sawrkar  a ngai a ni. Congress lo chu kan ram, kan hnam, kan sakhua min humhim sak theitu tur an awm lo. Chumi humhim turin congress kan sawrkar leh a ngai a ni," a ti.

Lalnunmawia Chuaungo chuan Congress-in ram hruaitu tha an nei tih sawiin, "Mizoram pawhin hruaitu tha kan mamawh a. Congress party chuan chutianga ram kaihruai tha thei tur hruaitu kan nei a. Kan ramah thalai ruihhlo ngai an tam. Kan NGO leh Kohhran te inpekna a ropui. Nimahsela, Sawrkar tha kan neih miau loh avangin Kohhran leh NGO te hmalakna hian duh angin kawngro a su chak thei lo. Kuthnathawktuten an thlai thar hlawk zawka an hralh theihna turin sawrkar tha kan mamawh. Mahni kutkawiha eizawngtute dinhmun chawikang turin Congress Party kan sawrkar a ngai a ni, a ti bawk.