Aizawl September 2, 2023 : Manipur buaina avanga buhfai an lakluhna thinah buhfai lakluh theih a nih loh avangin June ni 27,2023 atang khan Mizoram atangin buhfai thawn a ni a, hriattheih chinah buhfai quintals 30,000 thawn a ni tawh.

Food Corporation of India Divisional Manager Zodinpuii Ralte chuan vawiin (2.8.2023) khan an office, Tuikhuahtlang-ah chanchinbumite kawmin tun dinhmunah Mizoram chuan buhfai thla 3 ei daih a nei tih a sawi a. Tun dinhmunah buhfai stock 214610 qtls leh wheat 6559 qtls an nei tih a sawi a, naktuk Pathianni leh Thawhtanni ah te rel wagon 21 ve ve a lo thleng dawn niin a sawi bawk. 

Food Corporation of India Divisional Manager chuan Pathianni a rel a lo thlen changin buhfai hlanthlak kawngah harsatna an tawk thin tih a sawi bawk a. "Rel hi kan thuhnuaia awm a ni lo a, Pathianni ah hian lo thleng lo se, kan nau te pawh hi hahdam ve se kan duh hle a. Mahse kan thuneihna piah lam anih avangin Pathianni ah a lo thlen chang a awm thin a. Mahse khawtlang thuneitu lamin hlanthlak an phal loh chang a awm a, kan hlanthlak mai loh chuan cheng nuai tam tak kan chawi a ngai ta thin a, kan harsatna hi min hriatthiampui se kan duh hle a ni," a ti bawk.

Zodinpuii Ralte chuan FCI in buhfai an neih tam tumin a duh apiang lei theih turin lilam (auction) a ni thin tih sawiin ni 06.09.2023 hian wheat metric ton 800 leh leh buhfai metric ton 3000 chu lilam a ni leh dawn tih a sawi a. Buhfai an lilamna hi kg ah Rs.2 in tihhniam a ni tih sawi bawkin a hmaa kg ah Rs.31 ni thin chu Rs. 29 a ni tawh dawn niin a sawi bawk.