ZALEN December 11. 2023 : Vawiin khan Mizo Zirlai Pawl (MZP) General Headquarters, Aizawl chuan North East India State danga Zirlai pawlte rualin 'Black Day' an hmang.

North East Students' Organisation (NESO) chuan India rama Citizenship Amendment Bill pass tura hmalakna nasa takin a dodal a, Mizoramah ngei pawh theihtawp a dodal a ni. Chuti chung chuan ni 11 December, 2019 khan Rajya Sabha -ah pass a ni ta a. He ni hi North East Students' Organisation (NESO) chuan North East India mipuite palzutnaah a ngai a, lungawi lohna ni atan kum tin he ni hi 'Black Day' in a hmang ta a ni.

He ni hi India hmarchhak state hrang hrangah pawh hman niin, puan dum zar a nih bakah, banner a thuziak tar a ni hlawm. North East Students' Organisation-ah hian zirlai pawl pariat – Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) leh All Arunachal Pradesh Students’ Union (AAPSU) te an tel a ni.