Tun season Premier League Champion Manchester City chuan Zirtawpni zan khan si an phurh hmasak zet hnuah 4-3 in mual neitu Newcastle United an lehthal. An player naupang Ferran Torres chuan hat-trick siam a club hi a chakpui a ni. 

Inhnehtawk lo, inhnehtawk si chu
He inkhelhah hian Manchester City hi a tir atangin an chungnung zawk hle a, goal erawh an thun mai thei bik lo. Rin leh beisei loh takin minute 25-na lekah Jonjo Shelvey corner pet chu Emil Krafth chuan bet zawk  mual neitu hmahruaina turin mawi takin a lo tauh lut. Minute sawm pali a liam tihin Joao Cancelo chuan an siphurh a sut leh nghal a, minute 3 hnu lekah City hmahruaina goal Torres chuan rawn thun ve lehin chawlhlawk hma hretin Joelinton chuan penalty hmangin an siphurh a sut ve leh. 

 Mual chhungah ball inchan tam hleih hle mahse a pawimawh ber goal-ah erawh an inhnehtawk tlat. 

Goal lut zawm lovin chawlh lawk an hmang. Second half tan hnu minute 62-ah Willock chuan Newcastle hmahruaina goal a thun leh. Champion hlim City lamin talbuai an tum lo. Torres-a hmangin an chhang let nghal a, minute hnih hnu lekah chakna goal Torres-a bawk chuan a thun leh.

Aguero hmun ruak luah turin Torres a tling tawk em?
Premier League champion City chuan an striker Aguero thlakna tur an ngaihven mek a, chumi hmun ruak luah tur chuan Zirtawpni zana hat-trick siamtu Ferran Torres hi a tha tawh em? Valencia atanga an winger Leroy Sane thlakna tura an lak luh Torres-a theihna hrietu Pep chuan hma tawngah a dah a, a tisual lo. 

Torres hian tun season hian inelna hrang hrangah goal 19 lai a thun tawh. A thiam leh theihna hian City boss rilru hah mekna hi chhawk zo tak maw?
Sergio Aguero hmunruak luah tur Pep-a’n a zawng em ni?

Thla hmasa khan Pep Guardiola hian an striker chhuak tur, Aguero thlakna tur mi thar leina tur sum an neih loh thu a sawi tawh a. Sum dinhmun a zirin tun nipui transfer hian player tha pakhat tal chu lakluh ngei a duh thu pawh a sawi tel. He a duhna tihlawhtling tur erawh chuan Man City board member te thlawpna a mamawhin a rinawm. 

Tun season Premiere League-ah an champion chiang tawh a, May ni 29 a Champions League final khelh turah beiseina sang tak an nei mek bawk. 

Tun season zawh a chhuak mai tur Sergio Aguero thlak nan hian Borussia Dortmun champion puitu Erling Haaland, Harry Kane, Lautaro Martinez leh Andre Silva te chu Pep hian a hmu tai deuh niin an sawi a. A player beisei te hi an khelhna club theuh tana mi tangkai tawp an nih avang erawh chuan an man a hniamin a rinawm loh.

Barca leh Aguero ten inbiak remna an nei em ni?
    Official-a puan la ni lo mahse, season tawpa Man City chhuahsan tur Aguero leh Barcelona chuan inremna an nei tawh niin media thenkhatin an tarlang. An sawi dan chuan Champions League final khelh zawh hunah thutlukna an siam fel ang. Barca hian Atletico Madrid tan a lo khel tawh La liga lama mikhual lo Aguero hi kum hnih atan contract ziahpui an tum a, hetiang an tih chhan chu Messi-a chelh beh nan a thianpa Aguero hi lakluh an duh niin an sawi.