ZALEN, May 16, 2026: CK Hyundai chuan kum 12 an tlin rualin Champhaiah huang an zauh a, showroom leh service centre hawngin hma an sawnpui nghal tih an sawi.

Mizorama Hyundai car dealer hian kum 2014 khan Bawngkawn, Aizawlah showroom an hawng a, hma lam panin thla khatah chawhrualin car 80 vel an hralh chhuak hman a; mahse, eng emaw lai atangin car man tlawm zawrh tur an tlakchham bakah Mizoramah company dang an luh belh ve zel avangte leh chhan hrang hrang avangin an tla hniam a, inelna a sang chho hle tih an sawi.

Hma lam pan leh tumin kum 2022 khan Zotlang, Lungleiah Mizoram chhim lam tan showroom leh service centre hawng tawhin kum li hnuah New Champhaiah Rural Sales & Services Outlet an hawn belh leh ta a, Thawhtanni khan Mizorama Hyundai showroom pathumna hi Champhai North MLA Er Ginzalala’n a hawng a, “Champhai leh a chhehvel mipuiin awlsam zawkin India rama car tha leh changkang, Hyundai an lei thei tawh dawn a, hmasawnna rahbi pawimawh tak a ni,” a ti.

CK Hyundai chuan Champhaiah official-a showroom an hawn hma leh an hawn hnu, hun rei lo te chhungin car 19 an hralh tawh tih an sawi a, awmzia a nei hle tih a lang nghal a, kum 12 an tlinna kal mekah hmasawn tuma hma an lakna a ni a, service centre changtlung tak an bun tel a ni.

Hyundai car chi hrang chi 12 chuang an zuar mek a, Rs. nuai 5.6 man atanga Rs. nuai 30 chuang man thleng awmin i10, i20, Venue leh Creta te chu an hralh theih zual an ni a, hralh lama hmasawn zel tuma huang an zauh bakah service station tihchangtlun zel an ngai pawimawhin an thuam tha chho mek a ni.

CK Hyundai chuan kum 2026 kal mekah an vanglai pha tawh lo mah se an elpui dealer dangte angin thla khata sang viaua a hnua tlak hniam leh vak awm lovin mar tha takin zawi zawiin hma lam an pan a, nghet taka ke an pen theih avangin hmasawn zel turin beiseina leh phurhna an neih phah tih an sawi bawk.