May 15, 2024; Chief Minister leh Central YMA hruaituten Ruihhlo leh thil dang sawiho

Vawiin ni 15.5.2024(Nilaini) khan Central YMA hruaitute chuan Chief Minister Lalduhoma chu a Office ah an kawm a, Ruihhlo chungchang leh khua leh tui ni lo ten Document hrang hrang an neih chungchang te an sawiho.

Central YMA hruaitute chuan Mizorama ramdang mi, India khua leh tui ni lo ten khua leh tui dik tak te chauhin an neih theih Document hrang hrang- Adhaar Card, Voters ID etc. leh Birth Certificate neih tuma hma la an awm fo thu leh nei an awm thin thu te an sawi pui a, fimkhur taka kal a tul thu leh Common Service Centre te pawhin fimkhur taka an kal pui a tul thu an sawi. Chief Minister hian Prime Minister leh Union Home Minister rawtna anga Myanmar atanga raltlante hman tur Biometric Enrolment Portal siam thar a nih thu leh hman thuai a nih tur thu a lo hrilh bawk.

Ruihhlo do kawnga Sawrkar, NGO leh Kohhrante theihtawp chhuaha tanho a tul thu leh hun hmasa lama Sawrkarin Chief Minister kaihhruaina hnuaia Committee a lo din tawh ‘State Level Core Committee on Ruihhlo Do’ chu din thar leh a tul thu an sawipui bawk a. CM hian ruihhlo do kawnga theihtawpa hmalak a tul zia sawiin State Level Core Committee on Ruihhlo Do chu thutkhawm thuai a nih theihnan hma a lak tur thu a sawi.

CYMA hruaitute hian ILP pek chhuah dan phung an sawipui bawk a, Sawrkarin ILP Regulation a enthat mek thu leh a pek chhuah danah changtlung zawk Online Tracking System kalpui tum a nih thu a lo hrilh a, a tul angin CYMA te chu rawtna pawh siam turin a chah nghal bawk.

Chhungkaw tin te chhinchhiahna tur Mizoram Assembly House in a lo pass tawh Household Registration chungchangah buaipui ngai te buaipui mek a nih thu leh CYMA hruaitute pawhin lo ngaihven zui zel turin Chief Minister chuan a chah bawk.

Chief Minister nena inkawmnaah hian Lalhmachhuana, President leh OB dangte an tel.