Aizawl April 17, 2024 : Kolkata Ballygunge Mizoram House leinaa inhnamhnawih anga dâwt ngialngana puh a nihnaah; Chief Minister hlui, Zoramthanga fapa Ramthiansiama chuan January ni 18, 2024 khan HT Lalmawizuala, Judicial Magistrate 1st Class, Aizawl District Court-ah Criminal Complaint a thehlut a “Criminal Complaint No. 10 of 2024 dt. 22.01.2024 u/s 190 Cr.PC” hmangin Case Register a ni.

Court chuan, Officer-in-Charge, Cyber Crime Police Station Aizawl hnenah chhui chiang turin a hriattir a. Cyber Crime chuan March ni 26, 2024 khan an chhui zawhna ‘Investigation Report’ chu Court-ah an submit. Hemi chungchanga thu thehdarh (post) siamtu chu Zosangzuala (Sena Zote) Phullen khua, ZPM Worker, tuna Contract Work thawk mek chu, an hmawr bâwkna a ni tih hriat chian a ni.

Cyber Crime Investigation report-in a tarlan dan chuan Social Media Platform pakhat, Whatsapp-a thu thawntu (forwarder) mi engemawzat chu thu zawt fiah niin, an Statement lâk a ni a. An thil chhui hmawr bawknaah hian Thingtlang khaw pakhat “PHULLEN POLITICS” WhatsApp Group atanga lo chhuak a ni tih hriat a ni. Thu Post lo irhchhuahna ber hi “Sena Zote” -8731065704 niin, a hming dik - Zosangzuala H/o Laltharzeli Phullen a ni tih an hre thei.

Cyber Crime hian Zosangzuala chu puh a nih thu, a nupui Laltharzeli kaltlangin an hriattir tawh a. Police hnenah in-report turin March ni 15. 2024 khan koh a ni tawh bawk. Nimahsela, Zosangzuala (Sena Zote) inti hian zunthlum (blood Sugar) nei ang leh, thisen sâng (high bood pressure, hypertension) neih chhuanlamin zin chhuah a harsat niin a insawi.

Police Cyber Crime te chuan Zosangzuala chu a hma thei anga a hriselna dinhmun thar ber Cyber Crime Police Station-ah hrilh turin an hriattir a. Tun dinhmunah Zosangzuala hi Police (Cyber Crime) te hmaah a la inlan lo. Amah hi ngaihchan mek niin, Court thuremna pawh nghah mek a ni.