Aizawl September 5, 2022: Chin Kumthar Kut (Chin New Year Festival) hmanpuitu School Education Minister Lalchhandama Ralte chuan Myanmar-a remna leh muanna a thlen theih nan Mizoram Chief Minister Zoramthanga chuan theihtawp a chhuah tiin, sipai hotute leh hnam sipai hotute a bia, tih a sawi.

Ni 3.9.2022 (Inrinni) khan Chin New Year Festival hi Charlotte, North Carolina, USA -ah hman a ni a, he hun hmanpuitu, Minister Lalchhandama Ralte chuan, "Zo hnahthlak hmun hrang hranga awm te chu unau vek kan ni a, Myanmar-in harsatna a tawh chu Mizo mipuite harsatna pawh a ni nghal a ni. Myanmar-in remna leh muanna a neih theih nan Chief Minister-in nasa takin a bei a, Myanmar sipai hotute leh hnam sipai hotute a dawr a, India sorkar hotute pawh dawrin hma a la a ni," a ti.

Chhantea chuan, "Myanmar atanga raltlan Mizorama lutte chu Mizo mipui, Kohhran, tlawmngai pawl leh sawrkarin theih tawp chhuahin tuamhlawm hna an thawk a, chenna leh silhfen te pein naupang zirlaite pawh sangruk chuang chu lehkha zirtir an ni a, heng zirlaite hi zirlaibu leh uniform te pek an ni," a ti bawk.

Minister hian tanrual hi chakna a ni tih a sawiin, "Chibil angin tumah a din chhuah theih lo a, khawiah pawh awm ila, kan tanrual chuan hmelma pawh kan hneh ang," tiin, Chhulkhat kual kan nih anga, tanrualna thinlung pu tlat tur leh ram leh hnam din chhuah nan Pathian auva tangrual turin a chah.

Chin Kumthar Kutah hian zai leh lam bakah hnamzia rang hmanga incheina te entir a ni.