Aizawl July 6, 2024: Vawiin khan Chief Minister Lalduhoma chuan Prime Minister Narendra Modi chu N. Delhi-a a chenna inah a hmu a, Bangladesh atanga himna zawnga Mizoram rawn lut te chu a thawnkir theihloh thu a hrilh.

He an inkawmnaah hian Assam Rifles sawnchhuah chungchang te, Mizoram Sorkar Handholding Policy chungchang bakah Bangladesh atanga lo lut Zohnahthlak Bawm unaute chungchang te an sawi a. Chief Minister hian, Zohnahthlak Bawm unaute Bangladesh atanga himna zawnga Mizoram rawn lut te chu a thawnkir theihloh thu chiang takin Prime Minister hnenah hian a sawi a ni.

Prime Minister hi Mizo thar thei leh chawhmeh hrang hrang Sapthei (Passion Fruit), Dragon Fruit, Balhla leh Mautuai te a pe a. Prime Minister hian a lo ngaihlu hlawm hle. Sapthei phei hi chu a lo la hmu ngai lova, a ei dan tur thlengin a zawt a ni.

Heng thei hrang hrangte hi kuthnathawktute dinhmun leh Mizoram economy tihhmasawnna tura pawimawh tak a nih theih thute Chief Minister hian Prime Minister hnenah hian a sawi a ni.