April 25, 2024; Beng chak tawk lo, kum 85 mi an lo dawnsawn dan ah CM Duhoma leh a office thawktuten fak an hlawh hle.

Hemi chungchang thil thleng hi CM official IG page leh Youtube lamah te dahchhuah a ni a, comment tu tam ber ten CM leh a office thawktute an fak a, 'Mipui CM' tih te, 'Mi zawng zawng ban phak CM' tih te chu comment langsar an ni.

Video a a lan danin, beng lam chak tawh lo, Pu Lalhmangaiha (85), Chhiahtlang chu nimin khan CM office ah kalin appointment pawh a nei lawk lem lo niin a lang.

Heti chung hian CM a hmu thei a, hmaichhan ah a mamawh leh harsatna te a thlen thei a, CM pawhin a sum senso tur tum sak a lo in tiam bawk.

CM bakah CM office thawktute pawhin Pu Hmangaiha hi tha takin an lo dawngsawng a, bengdar a dilna kawng a a mamawh tur zawng zawng zawng kim takin an lo ziahfel sak vek bawk.